നുറുങ്ങുകദകള്‍

ആറേസി

2009-03-06T01:33:00.000+03:00

റിസര്‍വേഷന്‍ കണ്ടു് അവള്‍ ഞെട്ടിപ്പോയി. ആറേസി. അവന്‍ കരുതിക്കൂട്ടി ചെയ്തതാകും. അവനുമൊത്തു് ബെര്‍ത്ത് ഷെയര്‍ വരുമല്ലോ. ചില്ലറ ദൂരമൊന്നുമല്ല.
എന്താ ഇപ്പോ ചെയ്ക ? സ്ത്രീസമത്വം, സ്വാതന്ത്ര്യം എന്നൊക്കെ വായിട്ടലച്ചതു് അബദ്ധമായി. എന്നാലും ചോദിക്കുക തന്നെ, വേറെയെന്തെങ്കിലും ഉപായമുണ്ടോയെന്നു് നോക്കുകയും വേണം.

അവന്‍ ചിരിച്ചു. നിനക്കു് എന്തായാലും സീറ്റും ബര്‍ത്തും കിട്ടിയാല്‍ പോരേ. ഇത്ര വേവലാതിയെന്തിനു് ? ഇത്രയുള്ളോ നിന്റെ ധൈര്യവും വിശ്വാസവുമൊക്കെ ? പുറപ്പെടുമ്പോഴേക്കു് ഇതു് എന്തായാലും ഞാന്‍ കണ്‍ഫെമാക്കിത്തന്നേക്കാം. പോരേ.

റിസര്‍വേഷന്‍ ലിസ്റ്റ് കണ്ടു് അവള്‍ വീണ്ടും വിഷമിച്ചു. ഇനിയെങ്ങനെ കണ്‍ഫെമാകും. വണ്ടി പുറപ്പെടാറായില്ലേ. അവന്റെ വാക്കു് വിശ്വസിച്ചതു് അബദ്ധമായി. പക്ഷെ തനിക്കു് മറ്റു് മാര്‍ഗ്ഗവുമുണ്ടായിരുന്നില്ലല്ലോ. ഇനി വരുന്നിടത്തു് കാണാം.

എന്താടോ കുരങ്ങു് ചത്ത കുറത്തിയെപ്പോലെ ? അവനു് തമാശ. അവള്‍ക്കു് കരച്ചില്‍ വന്നു. ഒരു രാത്രി എങ്ങനെ തള്ളിനീക്കും ? അവന്റൊപ്പം ബര്‍ത്തു് പങ്കിടാന്‍ പറ്റില്ല.

അതവനു് കല്യാണത്തിനു് മുമ്പു് താന്‍ കൊടുത്ത വാക്കാണു് കോഴ്സ് കഴിയാതെ ഒറ്റ രാത്രിയും കിടക്ക പങ്കിടരുതെന്നു് !
ഈ ആറേസി ആരാണോ കണ്ടുപിടിച്ചതു് ?

ഫോട്ടോ

2009-02-05T20:30:00.167+03:00

സതിയ്ക്കുറക്കം വന്നില്ല. എന്തൊക്കെയാണു് സംഭവിച്ചതു്. സുരേഷ് എന്തൊരു ചതിയാണു് ചെയ്തതു്. അവന്റെ കൂട്ടുകാരുടെ മുന്നില്‍ വച്ചു് തന്നെ... അവനെ വിശ്വസിക്കാന്‍ കൊള്ളില്ലെന്നു് അലന്‍ പറഞ്ഞതാണു്. പക്ഷെ അലനെയാണു് തനിക്കു് വിശ്വാസമില്ലാതിരുന്നതു്. ആ ഫോട്ടോ ഇപ്പോള്‍ നെറ്റില്‍ നിറഞ്ഞുകാണും. എന്നാലും എങ്ങനെ അതവനു് കിട്ടി ? താനതു് ഉടന്‍ തന്നെ ഡിലിറ്റ് ചെയ്തതാണല്ലോ.
എന്തൊരു ഗ്രഹപ്പിഴയാണിതു് ദൈവമേ. പുതിയ ഡിജിറ്റല്‍ കാമറ കിട്ടിയപ്പോള്‍ ചെയ്ത ഒരു വികൃതി, അതിപ്പോ ഒരു പാരയായി.
ആരോടെങ്കിലും സത്യാവസ്ഥ പറയണമല്ലോ. അതിനു് മുമ്പു് എങ്ങനെ ഇതു് സംഭവിച്ചു എന്നു് കണ്ടുപിടിക്കണം. ആര്‍ക്കും ഇനി ഇങ്ങനെയൊരു അബദ്ധം പറ്റരുതല്ലോ. ഗൂഗിളിനോടു് ചോദിക്കാം. നെറ്റ്ബുക്കെടുത്തു് സേര്‍ച്ച് തുടങ്ങി. അഞ്ച് സൈറ്റുകള്‍ സന്ദര്‍ശിച്ചു് കഴിഞ്ഞപ്പോഴേക്കും ഏതാണ്ടു് കാര്യങ്ങള്‍ വ്യക്തമായി. ചതി. കൊടുംചതി തന്നെ.
തന്റെ കാമറയിലെ മെമ്മറിയില്‍ നിന്നും ഡാറ്റാറിക്കവറി റ്റൂള്‍ ഉപയോഗിച്ചു് ഫോട്ടോ റിക്കവര്‍ ചെയ്തതാണു്. അവനു് മെമ്മറി കാര്‍ഡ് കടം കൊടുത്തതാണു് അബദ്ധമായതു്. കാര്‍ഡ് കാലിയാക്കിയാണു് കൊടുത്തതു് . ഫോര്‍മാറ്റ് ചെയ്തോ എന്നോര്‍മ്മയില്ല. ഫോര്‍മാറ്റ് ചെയ്തു പോയതും റിക്കവര്‍ ചെയ്യാന്‍ പറ്റും എന്ന ഞെട്ടിപ്പിക്കുന്ന അറിവു് മുന്നിലിരിക്കുന്നു. സോ ദാറ്റ് മേക്ക് ലിറ്റില്‍ ഡിഫറന്‍സ്. പുതിയ അറിവു് അവള്‍ക്കു് പുതിയ ഒരു ഊര്‍ജ്ജം നല്‍കി. ഉറക്കം പറപറന്നു. അവനെ അങ്ങനെ വിട്ടാല്‍ പറ്റില്ല. ഫോട്ടോയെക്കുറിച്ചാലോചിച്ചു് വിഷമിച്ചിട്ടു് കാര്യമില്ല. വാ വിട്ട വാക്കു് പോലെയാണതു്. തിരിച്ചെടുക്കാന്‍ കഴിയില്ല. തന്റെ നിരപരാധിത്വം തെളിയിക്കണം. അവനെ ഒരു പാഠം പഠിപ്പിക്കുകയും വേണം. പരമാവധി വിവരങ്ങള്‍ ശേഖരിച്ചു കഴിഞ്ഞപ്പോഴേക്കും അവളെ ഉറക്കം കീഴടക്കി.
നേരം വെളുത്തയുടന്‍ അവള്‍ അലനെ വിളിച്ചു. അലനുമൊത്തു് പോയി സൈബര്‍ സെല്ലില്‍ പരാതി നല്‍കി.
"ഇതിപ്പോ നെറ്റിലൊന്നും എത്തിയിട്ടില്ലല്ലോ, എന്തു് പറഞ്ഞു് കേസെടുക്കും ?" സെല്‍ മേധാവി അവളെ നിരുത്സാഹപ്പെടുത്താന്‍ ശ്രമിച്ചു. "സര്‍ , അവന്റെ ലാപ്ടോപ്പും നെറ്റ്ബുക്കും പിടിച്ചെടുത്തു് പരിശോധിക്കണം. ഞാനീ പറഞ്ഞ ഫോട്ടോയും റിക്കവറി സോഫ്റ്റുവെയറും അതില്‍ കാണും. അതു് പോരേ തെളിവു് ?".
"നീ പറഞ്ഞതു് ഞങ്ങളെങ്ങനെ വിശ്വസിക്കും? നീ കാശു വാങ്ങി പോസ് ചെയ്തതാണെന്നു് അവന്‍ പറഞ്ഞാല്‍ ...?".

"പറയട്ടെ സര്‍ , അപ്പോള്‍ അതിനുള്ള മാര്‍ഗ്ഗം നോക്കാം. ഇതിനിപ്പോ ഒരു കേസിനും സ്കോപ്പില്ലേ ? ഞാനിനിയും മുകളിലോട്ടു് പോണോ ?"
"കുഞ്ഞേ, വയ്യാവേലിയാകും ഇതു്. വഴിക്കിട്ടിട്ടു് പോകില്ല എന്നു് ഉറപ്പു് തന്നാല്‍ ഞാന്‍ ഇടപെടാം." സെല്‍ മേധാവിയോടു് തോന്നിയ അമര്‍ഷം അലിഞ്ഞു്പോകുന്നതു് അവള്‍ അറിഞ്ഞു.
സൈബര്‍ സെല്ലിന്റെ വരവു് അപ്രതീക്ഷിതമായിരുന്നതു് കൊണ്ടു് സുരേഷിനു് തന്റെ ലാപ്ടോപ്പിലെ തെളിവുകള്‍ നശിപ്പിക്കാന്‍ കഴിഞ്ഞില്ല. എന്നാല്‍ പല ഫോട്ടാകളും മറ്റു് പല വമ്പന്മാരെയും കൂടി കൂട്ടുപ്രതിയാക്കാന്‍ പര്യാപ്തമായതു് കൊണ്ടു് കുറച്ചു് സമാധാനവും തോന്നി. എന്നാല്‍ സെല്ലിന്റെ ചോദ്യം ചെയ്യലില്‍ അയാള്‍ക്കു് കുറ്റം നിഷേധിക്കാന്‍ കഴിഞ്ഞില്ല. സതിയുടെ കണ്ടെത്തലുകള്‍ സത്യമാണെന്നു് അയാള്‍ സാക്ഷ്യപ്പെടുത്തി. ഇതു് ഒറ്റപ്പെട്ടതല്ലെന്നും മറ്റു് പലരേയും ഇവ്വിധം മുമ്പും ചതിച്ചിട്ടുണ്ടെന്നും വെളിപ്പെടുത്തി. സതിയുടെ ഫോട്ടോ നെറ്റിലേക്കു് വിട്ടിട്ടില്ലെന്നും അവളെ ബ്ലാക്ക്മെയില്‍ ചെയ്തു് തങ്ങളുടെ ഇരയാക്കിയാക്കിയ ശേഷം കൂടുതല്‍ ഹോട്ടായിട്ടുള്ള ചിത്രങ്ങള്‍ വിടാനായിരുന്നു പ്ലാനെന്നും അയാള്‍ പറഞ്ഞു. അപവാദം ഭയന്നു് പെണ്‍കുട്ടികള്‍ കീഴ്പെടാറാണു് സാധാരണ പതിവു്. സതിയെപ്പോലുള്ള പെണ്‍കുട്ടികള്‍ വളരെ അപൂര്‍വ്വമായതു് കൊണ്ടാണു് തങ്ങളുടെ ബിസിനസ് ഇത്രയും വളര്‍ന്നതു്.
കൂട്ടാളികളെക്കുറിച്ചു് പോലിസ് ഒന്നും ചോദിക്കാത്തതില്‍ സുരേഷിനു് നിരാശയായി. താനും തന്നെപ്പോലെയുള്ള ഡാറ്റാകലക്റ്റര്‍മാരും മാത്രം കുറ്റവാളികളായി ഈ കേസും അവസാനിക്കും. സഹായിക്കുമെന്നു് പ്രതീക്ഷിച്ചിരുന്ന പലരും കണ്ട ഭാവം നടിക്കുന്നില്ല.
"എടാ ഞങ്ങള്‍ പുറത്തുണ്ടെങ്കിലേ നിങ്ങളെ സഹായിക്കാന്‍ പറ്റൂ" കുറച്ചെങ്കിലും കണ്‍വിന്‍സിങായ ഒരു ഉത്തരമാണു് "മെന്റര്‍" പറഞ്ഞതു്. "അതിനു് പക്ഷെ ഞങ്ങളെ നീ ഒറ്റരുതു്. നിന്റെ ലാപ്ടോപ് വരുത്തിയ കുഴപ്പം പരിഹരിക്കാന്‍ ഞങ്ങള്‍ ശ്രമിച്ചുകൊണ്ടിരിക്കുകയാണു്. എല്ലാവരേയും ചിലപ്പോള്‍ രക്ഷിക്കാന്‍ പറ്റില്ല.നിന്റെ വീട്ടുകാരുടെ കാര്യം ഞാന്‍ നോക്കിക്കോളാം.ആ പെണ്ണിന്റെ കാര്യവും."

സതിയുടെ കാര്യമോര്‍ത്തു് സുരേഷിനു് വിഷമമായി. തന്നോടു് രഹസ്യമായി പറഞ്ഞു് തീര്‍ക്കേണ്ട കാര്യം... ഇപ്പോള്‍ അവളുടെ ജീവനു് തന്നെ ഭീഷണിയായിരിക്കുന്നു. അലന്‍ എന്ന "മെന്ററെ" കുറിച്ചു് എങ്ങനെ ഇനി അവളെ വാണ്‍ ചെയ്യും.

അവനതു് വേണ്ടി വന്നില്ല. അലന്റെ കത്തി അവനെ ഡിലെമയില്‍ നിന്നും രക്ഷിച്ചു.

[കഥ തുടരുകയാണു്...]

യാത്ര

2009-01-08T17:58:00.001+03:00

ഇനിയെന്നാ നാട്ടിലേക്കു് ? തികച്ചും സ്വാഭാവികമായ ചോദ്യമാണു് സുഹൃത്തു് ചോദിച്ചതു് . മറുപടി കൊടുത്തതിങ്ങനെ : "ആഗസ്തില്‍ പോകണമെന്നാണു് കരുതുന്നതു് . സ്കൂളടയ്ക്കുന്നതപ്പോഴാണല്ലോ." സാധാരണ അത്രയും മതി മറുപടി. എന്നാല്‍ മനസ്സിലേക്കു് വന്ന അനാവശ്യഭയം അയാള്‍ക്കു് മറയ്ക്കാന്‍ കഴിഞ്ഞില്ല .അയാള്‍ തുടര്‍ന്നു. "പ്രത്യേകിച്ചു് വിശേഷങ്ങളൊന്നുമില്ലെങ്കില്‍ .പിന്നെ എമര്‍ജന്‍സി വന്നാല്‍ പോകാതൊക്കില്ലല്ലോ , അതിനു് സമയം നോക്കാന്‍ പറ്റുമോ ?".

സ്കോര്‍

2008-12-06T18:50:00.001+03:00

മുംബൈ കത്തിയെരിയുന്നു. റ്റെലിവിഷനിലെ വിഡ്ഢികളുടെ ജല്‍പ്പനത്തിനു് അല്‍പ്പം സ്നാക്ക്സും മേമ്പൊടി ചേര്‍ത്തു് അയാളിരുന്നു. ഫോണിന്റെ വൃത്തികെട്ട ശബ്ദം . അയാളോര്‍ത്തു. ഇതു് മാറ്റാന്‍ സമയമായി. മുംബൈയില്‍ നിന്നു് ഹഫീസ്.
വളരെ വേണ്ടപ്പെട്ട ചങ്ങാതി. എന്നാല്‍ വായില്‍ വന്നതിങ്ങനെ "സ്കോറെത്രയായെടാ?". ആ ചോദ്യം അവന്‍ പ്രതീക്ഷിച്ചില്ലെന്നു് തോന്നുന്നു. "ഒരു നൂറ്റമ്പതൊക്കെ ആയിക്കാണും. ഞാന്‍ വിളിച്ചതു് വളരെ പ്രധാനപ്പെട്ട ഒരു കാര്യം പറയാനാണു് " .
"എന്തെടാ വേറെ പ്രധാനപ്പെട്ടതു് ? " അയാള്‍ക്കു് നീരസമായി.
"ആ നൂറ്റമ്പതിലോ അതിനു് പുറത്തോ നിന്റെ റീനയുമുണ്ടെന്നു് കേള്‍ക്കുന്നു. ചെന്നൈയില്‍ നിന്നു് അത്യാവശ്യമായി ഒരു മീറ്റിങിനു് വന്നതായിരുന്നത്രെ. അവളുടെ കമ്പനിയില്‍ നിന്നും കിട്ടിയ വിവരമാണു്. നീ എത്ര..."

അയാള്‍ ബോധരഹിതനായതൊന്നും അറിയാതെ റ്റെലിവിഷന്‍ ലൈവ് തുടര്‍ന്നുകൊണ്ടേയിരുന്നു.

അവള്‍ അവള്‍ മാത്രം

2008-11-21T15:59:00.004+03:00

അതവള്‍ തന്നെ. ഒരിക്കലും അവളെ മറക്കാന്‍ കഴിയില്ല. ഏതാള്‍ക്കൂട്ടത്തിലും അവളുടെ സാമീപ്യം തനിക്കു് തിരിച്ചറിയാനാകും. എങ്ങനെയാണു് ഒന്നു് സംസാരിക്കുക. മഹാനഗരത്തിലെ സ്റ്റാര്‍ ഹോട്ടല്‍. വലിയൊരു പാര്‍ട്ടി. ഒരു സാധാ ജീവനക്കാരനായ താനെങ്ങനെ ചീഫ് ഗസ്റ്റിന്റെ കൂടെ വന്ന അവളോടു് സംസാരിക്കും. അയാള്‍ ആകെ വിഷമത്തിലായി. ഒരു മൂലയിലേക്കൊതുങ്ങി അയാള്‍ ഇരുന്നു. ഇടിച്ചുകയറിയാലോ? അവളുടെ പ്രതികരണം എന്താകുമോ ആവോ. തന്നെ അറിയില്ലെന്നു് പറഞ്ഞാല്‍ തീര്‍ന്നു.
"ഹായ് ആനന്ദ് " അവള്‍ മുന്നില്‍. അയാള്‍ കണ്ണു് തിരുമ്മിനോക്കി. അവള്‍ തന്നെ.
"എന്താ ആനന്ദ്. പ്രേതത്തെ കണ്ടതു് പോലെ. ഞാന്‍ വന്നതിഷ്ടമായില്ലേ?"
അയാള്‍ക്കു് വാക്കുകള്‍ കിട്ടിയില്ല. എന്താണു് വിളിക്കേണ്ടതു് . മാഡം എന്നോ, അതോ തുഷാര എന്നോ, അതോ തുഷ് എന്നോ.
"എനിക്കു് വിശ്വസിക്കാന്‍ പറ്റുന്നില്ല. എന്നെ മറന്നില്ല അല്ലേ." വാക്കുകള്‍ അറിയാതെ പുറത്തു് ചാടി.
"അങ്ങനെ പറഞ്ഞുകൂടാ. മറന്നതായിരുന്നു. കണ്ടപ്പോള്‍ തിരിച്ചറിഞ്ഞു എന്നു് മാത്രം. ആ മൂലയില്‍ ഒറ്റക്കിരുന്നതു്കൊണ്ടാണു് കാണാന്‍ പറ്റിയതു്. എന്തെ ഇത്ര നാളും എന്നെ അന്വേഷിക്കാതിരുന്നതു്? വലിയ പ്രാരാബ്ധക്കാരനായിപ്പോയോ? "
അന്വേഷിച്ചില്ലത്രെ. ഭാര്യയെവരെ പിണക്കിയയച്ചതു് ഇവളെച്ചൊല്ലിയാണു്. വെബിലും ബ്ലോഗിലും ഓര്‍ക്കുട്ടിലും ഫേസ്ബുക്കിലും തേടിയതു് പിന്നെ ആരെയാണു്. ആര്‍ക്കു് വേണ്ടിയാണു് താന്‍ ബ്ലോഗെഴുതാന്‍ തുടങ്ങിയതു്. അന്വേഷിച്ചില്ലത്രെ. എത്ര എളുപ്പം പറയാന്‍ കഴിഞ്ഞു. എങ്കിലും ഇപ്പഴെങ്കിലും കണ്ടല്ലോ.
"എന്താ ആനന്ദ് , ഇപ്പഴും സ്വപ്നലോകത്തില്‍ തന്നെയാണല്ലേ. എന്നാല്‍ ഞാന്‍ ചെല്ലട്ടെ."
അവള്‍ നീങ്ങി. അയാള്‍ വിഷണ്ണനായി. ഇതിനാണോ താന്‍ ഇത്ര നാളും ഇവളെ തേടി നടന്നതു്.
"ഹൂയിസ് ദ് ഗയ് , മാം" ഏതോ സില്‍ബന്ധിയാകണം, അവളോടു് ചോദിക്കുന്നു.
"വണ്‍സ് ഐ വാസ് തിങ്കിങ് ടു മാരി ഹിം. അയാം ഗ്ലാഡ് ഐ ഡിഡ്ന്റ് " അവളുടെ മറുപടി.

അല്ലെങ്കിലും അവള്‍ എന്നും സത്യസന്ധയായിരുന്നു. അതു്കൊണ്ടാണു് തനിക്കിപ്പഴും അവളെ വെറുക്കാന്‍ കഴിയാത്തതു്. ആരാധന മാത്രമുള്ളതു്.

മുസ്ലിം വൃത്തി

2008-11-21T15:29:00.000+03:00

"ഇവിടെ മുസ്ലിംകളാണോ താമസം?" മുതവ്വ വയലന്റായിത്തുടങ്ങി.
എന്താ കാര്യം - അദ്ദേഹത്തെ തണുപ്പിക്കാന്‍ ഒരു ശ്രമം നടത്തിനോക്കി.
"നീ തന്നെ പറ. നീയൊരു കാഫിറല്ലേ. എന്നിട്ടും നിന്റെ വീട്ടിനടുത്തു് എന്തെങ്കിലും വൃത്തികേടുണ്ടോ. ഇങ്ങോട്ടു് നോക്കു് . ഈ വെയിസ്റ്റൊക്കെ ഇട്ടിരിക്കുന്നതു് കണ്ടോ. മുസ്ലിംകളാണു് എന്നു് പറഞ്ഞതു് കൊണ്ടാണു് ഞാന്‍ റൂം കൊടുത്തതു് ."

പാവം മുതവ്വ. പല്ലു് തേക്കാത്ത മിസ്രികളെയും കുളിക്കാത്ത പാക്കിസ്ഥാനികളെയും റോഡരികില്‍ മൂത്രമൊഴിക്കുന്ന നാനാരാജ്യക്കാരെയും അദ്ദേഹം കണ്ടുകാണില്ലേ ആവോ.ഇനി അതും കൂടി പറഞ്ഞു് അദ്ദേഹത്തെ വിഷമിപ്പിക്കുന്നതെന്തിനു്.
ഞാന്‍ വിട്ടു.
(എന്നാലും എന്നെ കാഫിറെന്നു് വിളിച്ചില്ലേ, കെളവന്‍!)

തലമുടി

2008-10-29T22:32:00.000+03:00

"നിങ്ങളുടെ മുടി കൊഴിയുന്നുണ്ടോ ? " അവന്റെ ഉത്കണ്ഠ കണ്ടു് അയാള്‍ക്കു് വിഷമം തോന്നി. ആദ്യമാദ്യം തമാശയായാണു് തോന്നിയതു്. പക്ഷെ പിന്നീടവന്റെ ഉത്കണ്ഠ കൂടുന്നതും മുടി കുറയുന്നതും കണ്ടപ്പോള്‍ അതു് വിഷമത്തിനു് വഴിമാറി.
"നീ എപ്പഴും വലിച്ചു നോക്കുന്നതു് കൊണ്ടാണു് മുടി കൊഴിയുന്നതു്. നിനക്കു് അടങ്ങിയിരുന്നൂടേ."
ബീഹാറിലെ ഒരു ഗ്രാമീണന്‍ . വിദേശവാസം തുടങ്ങുമ്മുമ്പു് നല്ല മുടിയുണ്ടായിരുന്നു പോലും. അവധി കഴിഞ്ഞു് വന്നതോടെയാണു് ഇത്രയും വിഷമം കാണുന്നതു്. നാട്ടില്‍ ഭാര്യയൊഴികെ മറ്റെല്ലാവരും ചോദിക്കുന്നുവത്രെ. അവള്‍ എങ്ങനെ ചോദിക്കുമെന്നു് കരുതിയിട്ടാകും.
"എന്നാ നിനക്കു് വിഗ് വെച്ചു് കൂടെ? നല്ല ധാരാളം വിഗ് മാര്‍ക്കറ്റിലുണ്ടല്ലോ ?"
എന്തെങ്കിലുമൊക്കെ പറയണമല്ലോ.
"വിഗ് ഒന്നും ശരിയാകില്ല. നിങ്ങള്‍ക്കു് ഞങ്ങളുടെ നാട്ടുകാരെ അറിയില്ല."

മാസങ്ങള്‍ കഴിഞ്ഞു. അടുത്ത അവധിയായി.
അവധി കഴിഞ്ഞു് വന്നയവനു് വിഷമമേയില്ല. മുടി ട്രാന്‍സ്‌പ്ലാന്റ് ചെയ്തിരിക്കുന്നു. ദില്ലിയില്‍ തന്നെയായിരുന്നു അവധി മുഴുവന്‍ . ഭാര്യയെയും കൂട്ടി ദില്ലിയില്‍ തന്നെയങ്ങു് കൂടിയത്രെ. പൈസ കുറെ ചെലവായെങ്കിലെന്താ മനഃസമാധാനം കിട്ടിയില്ലേ എന്നാണു് അവന്‍ ചോദിക്കുന്നതു്. ഇനി ഭാര്യയെ ഇങ്ങോട്ടു് കൊണ്ടുവരണം. അവന്‍ ഒരു പുതിയ മനുഷ്യനായി മാറിയതു്പോലെ. "തലമുടിക്കു് ഇത്ര പവറോ?" അയാള്‍ക്കു് അതിശയം തോന്നി.

മാനേജ്‌മെന്റുമായുള്ള തര്‍ക്കം മൂലം അയാള്‍ ജോലി ഉപേക്ഷിച്ചപ്പോള്‍ അവന്‍ ഉപചാരവാക്കുകള്‍ക്കൊന്നും പരതിയില്ല.

പിന്നീടറിഞ്ഞു കംപ്രസര്‍ നന്നാക്കുമ്പഴോ മറ്റോ മുടി കുരുങ്ങി അവന്‍ മരിച്ചുപോയെന്നു്.
മുടിയുടെ പവറിനെക്കുറിച്ചോര്‍ത്തു് അയാള്‍ നടുങ്ങി.

ഞാന്‍ വിവാഹിതയാകുന്നു

2008-10-17T08:37:00.000+03:00

അരുണ,
അങ്ങനെ ഞാനും വിവാഹിതയാകാന്‍ തീരുമാനിച്ചു. ഈ കത്തവിടെ കിട്ടുമ്പോഴേക്കും ഞാന്‍ ഒരു സാധാ വീട്ടമ്മയായി മാറിയിരിക്കും. വിവാഹത്തിനൊന്നും ക്ഷണിക്കുന്നില്ല. വളരെ ലളിതമായിരിക്കും ചടങ്ങു് എന്നതു് കൊണ്ടു് തന്നെ.
വിദേശത്താണു് ആള്‍ക്കു് ജോലി. എന്തു് ജോലിയാണെന്നൊന്നും ചോദിക്കരുതു്. നീ അമ്പരക്കേണ്ടതില്ല. വിദേശത്തു് ജോലിയുള്ള പലരുടെയും ആലോചനകള്‍ പണ്ടു് ഞാന്‍ ഒഴിവാക്കിയിരുന്നതു് നിനക്കും അറിയാം. കാരണവും. എന്റെ ഇവിടത്തെ ജോലി കളഞ്ഞിട്ടു് എനിക്കതിനാകുമായിരുന്നില്ലല്ലോ. ഇപ്പോള്‍ ആ പ്രശ്നമില്ല. കഴിഞ്ഞയാഴ്ച മാനേജ്മെന്റ് എനിക്കു് ആ പിങ്ക് സ്ലിപ് തന്നു.
ഇനി വേറെ ജോലിയന്വേഷിച്ചു് നടക്കേണ്ട എന്നും ഞാനും കരുതി. ആര്‍ക്കെങ്കിലും ഒരു ജോലിയായി മാറാന്‍ അങ്ങനെ ഞാന്‍ തീരുമാനിച്ചു. വളരെ ലേറ്റസ്റ്റായി വന്ന ഒരു പ്രപ്പോസല്‍ ഫോര്‍വാഡ് ചെയ്തു. എല്ലാം പെട്ടെന്നായിരുന്നു.
നിന്റെ നാട്ടിലേക്കു് തന്നെയായിരിക്കും ഞാനും വരുന്നതു്. കമ്പ്യൂട്ടറിനോടു് തന്നെ സമരം പ്രഖ്യാപിച്ചിരിക്കുന്നതു് കൊണ്ടാണീ സ്നെയില്‍ മെയില്‍ . അവിടെയെത്തിയാല്‍ വിളിക്കാം.
സ്നേഹത്തോടെ,
കരുണ.

കുട്ടി വൃദ്ധന്‍

2008-10-16T23:55:00.000+03:00

വൃദ്ധന്‍ ചിരിച്ചു. കുട്ടി ചിരിച്ചില്ല.
വൃദ്ധന്‍ ശബ്ദമില്ലാതെ വിളിച്ചു: "ഇവിടെ വരൂ".
കുട്ടി ശബ്ദമില്ലാതെ തന്നെ പറഞ്ഞു: "ഇല്ല".
വൃദ്ധന്റെ ചിരി മാഞ്ഞു. കുട്ടിയ്ക്കും സങ്കടമായി.
വൃദ്ധന്‍ സമയം നോക്കി. കുട്ടി എഴുന്നേറ്റു.
"മമ്മീ എന്റെ റ്റൈം കഴിഞ്ഞു.".
മകളുടെ വരവും കാത്തു് വൃദ്ധന്‍ കിടന്നു.

വീടു്കൊള്ള

2008-10-01T16:11:00.000+03:00

ശക്തമായ മുട്ടു് വാതുക്കല്‍ കേട്ടു് കൊണ്ടാണു് അവള്‍ എണീറ്റതു്. ഇവറ്റകള്‍ക്കു് കോളിങ് ബെല്‍ അടിച്ചൂടേ. നാശങ്ങള്‍ . ഉറങ്ങാനും സമ്മതിക്കില്ല.
ആരാ ? മറുപടിയില്ല.
പീപ്പിങ് ഹോള്‍ മറച്ചു്കൊണ്ടാണു് വന്നതാരായാലും നില്‍പ്പു്.
ആരാ ? മറുപടിയില്ല. പക്ഷെ, പിന്നെയും മുട്ടു് വന്നു.
എന്നാപ്പിന്നെ അങ്ങേരായിരിക്കും. അങ്ങനെ ഒരു സൂക്കേടുണ്ടു്. വെറുതെ പേടിപ്പിക്കാനാണു് പോലും അങ്ങനെ ചെയ്യാറു്. ആരെ പേടിപ്പിക്കാനാണോ എന്തോ ? എന്തായാലും തുറന്നേക്കാം.
വാതില്‍ തുറന്നതും രണ്ടുമൂന്നാളുകള്‍ ഇടിച്ചുകയറി. "അനങ്ങിപ്പോകരുതു് ".
അവള്‍ക്കു് ചിരി വന്നു. ചിരിച്ചു.
വന്നവരില്‍ നേതാവായിരിക്കണം, ചോദിച്ചു "എന്തിനാ ചിരിക്കുന്നതു്. അനങ്ങിപ്പോകരുതെന്നല്ലേ പറഞ്ഞതു്."
അവള്‍ക്കു് ദേഷ്യം വന്നു. "എന്റെ വീട്ടില്‍ കയറി വന്നിട്ടു് അനങ്ങിപ്പോകരുതെന്നോ. ഇതെന്തു് കഥ"
"എന്തിനു് അനങ്ങാതെ നില്‍ക്കണം ? ഇതെന്റെ വീടാണു്."
"നീ അധികം സംസാരിക്കണ്ട. അല്ലെങ്കില്‍ എന്റെ തോക്കായിരിക്കും പ്രവര്‍ത്തിക്കുക" ഒരു പെണ്ണിനോടു് കാര്യങ്ങള്‍ വിശദീകരിക്കേണ്ടി വന്നതിന്റെ ജാള്യം അയാള്‍ക്കു് മറച്ചുവെക്കാന്‍ കഴിഞ്ഞില്ല. അവള്‍ക്കു് പാവം തോന്നി.
"ഇരിക്കൂ. ഞാന്‍ ചായയെടുക്കാം" അവള്‍ പറഞ്ഞു.
"നിന്നോടു് അനങ്ങാതെ നില്‍ക്കാനാണു് പറഞ്ഞതു് " അയാള്‍ പരിഭ്രാന്തനായിത്തുടങ്ങി.
"നിങ്ങളോടു് ഞാന്‍ പറഞ്ഞു, എന്റെ വീട്ടില്‍ കാര്യങ്ങള്‍ തീരുമാനിക്കുന്നതു് ഞാനാണു്.
എന്താണു് നിങ്ങളുടെ പ്രശ്നം? എന്നെ എന്തിനാണു് പേടിപ്പിക്കാന്‍ ശ്രമിച്ചു് വിഷമിക്കുന്നതു് ? "
"ഞങ്ങള്‍ നിന്റെ വീടു് കൊള്ളയടിക്കാന്‍ വന്നതാണു് എന്നു് ഇതുവരെ മനസ്സിലായില്ലേ?" നേതാവല്ല ഇത്തവണ സംസാരിച്ചതു്.
"വീടു്കൊള്ളയോ? എന്തിനു് ? ഇവിടെ എന്തിരുന്നിട്ടു് ? ഇനി ഇവിടെ എന്തെങ്കിലും ഉണ്ടെങ്കിത്തന്നെ ഇങ്ങനെയാണോ കൊള്ളയടിക്കുന്നതു് ? എന്റെ അങ്ങേരു് ഒരു സെക്യൂരിറ്റി സിസ്റ്റം എക്സ്പെര്‍ട്ട് ആണെന്നും ഈ വീടു് സര്‍വൈലന്‍സ് കാമറകള്‍ നിരീക്ഷിച്ചുകൊണ്ടിരിക്കുകയാണെന്നും നമ്മുടെ ഈ സംഭാഷണം പോലും അദ്ദേഹമിപ്പോള്‍ ഓഫീസിലിരുന്നു് കാണുന്നുണ്ടാകുമെന്നും നിങ്ങള്‍ക്കു് അറിയാത്തതു് എന്റെ കുഴപ്പമല്ല . ഒരു ഹോം വര്‍ക്കും ചെയ്യാതെയാണോ കൊള്ളയ്ക്കിറങ്ങുന്നതു്. ഇരിക്കൂ, സംഭാരമെങ്കിലും എടുക്കാം"
അവള്‍ അടുക്കളയിലേക്കു് നടന്നു. അടുക്കളയിലെത്തുമ്മുമ്പെ മുന്‍വാതില്‍ അടയുന്ന ശബ്ദം അവള്‍ കേട്ടു. വേഗം ഫോണെടുത്തു ഭര്‍ത്താവിനെ വിളിച്ചു "നിങ്ങളുടെ ഫാന്‍സിഡ്രസുകാരെ ഞാന്‍ തോല്‍പ്പിച്ചു. തീരെ പ്രൊഫഷണല്‍സല്ല".
"ഞാനാരെയും അയച്ചില്ലല്ലോ.അവിടെ ആരാ വന്നതു് . എന്താ ഉ.. ഹലോ..ഹലോ.."

മുഖത്തു് വെള്ളം വീണപ്പോള്‍ അവള്‍ കണ്ണു് തുറന്നു് നോക്കി. ഭര്‍ത്താവിന്റെ മുഖം കണ്ടു് അവള്‍ കണ്ണു് നിറച്ചു.

ഗുരവേ നമഃ

2007-11-02T02:56:00.000+03:00

റിസള്‍ട്ട് അറിയാനാണു് അവന്‍ കോളജില്‍ എത്തിയതു്. ആംഗലേയത്തില്‍ 95% ! പ്രതീക്ഷിച്ചതാണു് . എന്നാലും സന്തോഷം തോന്നി. പുറത്തേക്കിറങ്ങുമ്പോള്‍ ഇംഗ്ലിഷ് പഠിപ്പിച്ചിരുന്ന അദ്ധ്യാപകന്‍. ക്ലാസ്സിലിരുന്നു് സംസാരിച്ചതിനു് പുറത്താക്കിയ ദേഹം. വീട്ടില്‍ നിന്നു് ആരെങ്കിലും വന്നിട്ടു് ക്ലാസ്സില്‍ കയറിയാല്‍ മതിയെന്നായിരുന്നു ഓര്‍ഡര്‍. അതു്കൊണ്ടെന്താ, പിന്നീടു് അദ്ദേഹത്തിന്റെ ക്ലാസ്സില്‍ കയറിയിട്ടില്ല. തനിക്കു് കിട്ടിയ മാര്‍ക്കെത്രയാണെന്നു് അദ്ദേഹത്തെ ഒന്നറിയിച്ചേക്കാം. "സര്‍, റിസള്‍ട്ട് കിട്ടി. 95% ഉണ്ടു് "(തന്റെ ക്ലാസ്സീക്കേറിയില്ലെങ്കിലും എനിക്കൊരു ചുക്കുമില്ലെടോ) വിനയത്തേക്കാള്‍ അഹങ്കാരമായിരുന്നു വാക്കുകളില്‍.
"നന്നായി വരും. നീ മിടുക്കനാണെന്നെനിക്കറിയാമായിരുന്നു. പരീക്ഷ കഴിഞ്ഞാല്‍ ഒന്നു് തിരിഞ്ഞു്കൂടി നോക്കാത്ത കുട്ടികളുള്ള കാലത്തു് നീ ഈ സന്തോഷത്തില്‍ പങ്കു് ചേരാന്‍ എന്നെയും അനുവദിച്ചല്ലോ. നിന്റെ ക്ലാസ്സിലിരുന്നുള്ള സംസാരം മറ്റു കുട്ടികള്‍ക്കു് ബുദ്ധിമുട്ടാവുമെന്നു് മനസ്സിലാക്കിയാണു് നിന്നോടു് ക്ലാസ്സില്‍ കയറേണ്ടതില്ലെന്നു് പറഞ്ഞതു്. അതില്‍ നിനക്കു് യാതൊരു പരിഭവവുമില്ലാത്തതിലും സന്തോഷം....

ടോ താന്‍ കരയുന്നതെന്തിനു്...
"

ഞാന്‍ ബിസിയാണു്

2007-10-30T22:39:00.000+03:00

ഈ കുഞ്ഞിനെയൊന്നു് എടുക്കാമോ
ഞാന്‍ ബിസിയാണു്

ഈ കുട്ടിയ്ക്കെന്തെങ്കിലും പറഞ്ഞുകൊടുക്കാമോ
ഞാന്‍ ബിസിയാണു്

വീട്ടിലേക്കൊന്നു് വിളിക്കാമോ
ഞാന്‍ ബിസിയാണു്

ഷര്‍ട്ടൊന്നു് തേക്കാമോ
ഞാന്‍ ബിസിയാണു്

വീടൊന്നു വാക്വം ചെയ്യാമോ
ഞാന്‍ ബിസിയാണു്

വെള്ളം വന്നിട്ടുണ്ട്. ഒന്നു് കുളിച്ചൂടേ
ഞാന്‍ ബിസിയാണു്

എന്റെ മെയിലൊന്നു് ചെക്കു് ചെയ്യാമോ
ഞാന്‍ ബിസിയാണു്

എന്താത്ര ബിസി
ഞാന്‍ ചാറ്റിങ്ങിലാണു്

വിനോദയാത്ര

2007-10-30T13:34:00.000+03:00

"കഴിഞ്ഞ പ്രാവശ്യം കൊണ്ടു്തന്നെ എനിക്കു് മതിയായി. ഞാനില്ല" സൂപ്പര്‍ പാരാവതാരം എടുത്തു അവള്‍. അവളില്ലെങ്കില്‍ പിന്നെ ആണ്‍കുട്ടികളെ ടൂറിനു് നോക്കണ്ട.
നാലു് ചില്ലറയൊപ്പിക്കാനുള്ള വഴിയടയുന്നതു് എങ്ങനെയെങ്കിലും ഇല്ലാതാക്കണം. അവളെ അനുനയിപ്പിച്ചേ പറ്റൂ.
"എന്തു് പ്രശ്നമാണെങ്കിലും നമുക്കു് പരിഹരിക്കാം."
"ഞാനില്ല"
"കഴിഞ്ഞ വട്ടം ആരെങ്കിലും തന്നോടു് മോശമായി പെരുമാറിയോ? "
"ഓര്‍ത്തു് നോക്കു് "
"ഞാനൊന്നും ചെയ്തിട്ടില്ല എന്നെനിക്കു് ഉറപ്പാണു് " - വെറുതെ പഴി കേള്‍ക്കാന്‍ വയ്യ.
"അതു് തന്നെയാണു് കാര്യം. താനൊന്നും ചെയ്തില്ല."
ഈശ്വരാ ഈ കുട്ടി ഇങ്ങനെയായിരുന്നോ. വെറുതെ ചാന്‍സ് കളഞ്ഞു. ബീച്ചിലും ഹോട്ടലിലുമൊക്കെ എത്ര അവസരങ്ങളുണ്ടായിരുന്നു. പറഞ്ഞിട്ടെന്താ കാര്യം.
"എന്തു് ?"
"താനെനിക്കു് ഐസ്‌ക്രീം വാങ്ങിത്തന്നോ. ഒരു ഇന്‍ലന്റ് വാങ്ങിത്തരാന്‍ പറഞ്ഞപ്പോ എന്തായിരുന്നു ഗമ?"

ആരോ ഒരാള്‍

2007-10-29T15:41:00.000+03:00

വീണ്ടും നാട്ടിലേക്കു്. ഇത്തവണ ഒരു സര്‍പ്രൈസാവണം അവര്‍ക്കു്. അതു്കൊണ്ടു് വീട്ടിലറിയിച്ചില്ല. എയര്‍പോര്‍ട്ട് കൌണ്ടറില്‍ ടാക്സിയ്ക്കു് പണമടച്ചു. കുട്ടികളെയും പെട്ടികളെയും കൊണ്ടു് അവളോടൊത്തു് ബേയിലേക്കു് നടന്നു. രശീതി കാണിച്ചപ്പോള്‍ ഒരു വണ്ടി അടുത്തേക്കു് വന്നു. ഡ്രൈവറെക്കണ്ടിട്ടയാള്‍ക്കു് വിശ്വാസം വന്നില്ല. ഒന്നു് കൂടി നോക്കി ഉറപ്പു് വരുത്തി. എഞ്ചിനിയറിങ്ങ് കോളജില്‍ ഒന്നിച്ചു് പഠിച്ചവന്‍. തന്റെ കൂടെ എല്ലാ വേണ്ടാതീനങ്ങള്‍ക്കും ഒപ്പമുണ്ടായിരുന്നവന്‍. അവന്റെ അറച്ചുള്ള ചിരി അതു് ശരി വെച്ചു.
"അവന്‍ പരിചയം കാണിക്കാതിരുന്നാല്‍ മതിയായിരുന്നു." അയാള്‍ വണ്ടിയില്‍ കയറി....

വ്യാജ ഒപ്പ്

2007-10-25T16:49:00.000+03:00

"അയ്യടാ തെറ്റിപ്പോയി ". പ്രാക്റ്റിക്കല്‍ റെക്കോര്‍ഡ് ബുക്കില്‍ ഇരുപതാമത്തെ ഒപ്പിട്ടപ്പോള്‍ അവന്‍ പറഞ്ഞു് " ഒരു കാര്യം ചെയ്യാം. ഇതു് കീറി രണ്ടാമതെഴുതാം. അല്ലെങ്കില്‍ പിടിക്കും"
"ഓ പിന്നേ. അത്രയ്ക്കൊന്നും മനസ്സിലാവില്ല. സാരമില്ല. ഞാന്‍ സബ്മിറ്റ് ചെയ്യാന്‍ പോണു."

"പ്രശാന്ത് ഇവിടെ വരൂ. എന്താ എന്റെ കള്ളയൊപ്പിട്ടാല്‍ എനിക്കു് മനസ്സിലാവില്ലെന്നു് കരുതിയോ ?"
"ഇപ്പോ മനസ്സിലായി."

മൂല്യച്യുതി

2007-10-23T23:47:00.000+03:00

പത്രത്തിലെ രണ്ടു് വാര്‍ത്തകള്‍ അയാളുടെ സവിശേഷശ്രദ്ധ ആകര്‍ഷിച്ചു. ഒന്നു്: നഗരത്തില്‍ നിശാനൃത്തം കൊഴുക്കുന്നു. രണ്ടു്: മൊബൈലില്‍ നീല തരംഗം വീണ്ടും.
പത്രം അയാള്‍ സുഹൃത്തിനെ കാണിച്ചു. "ഇങ്ങനെ പോയാല്‍ നമ്മുടെ നാടു്..." യില്‍ തുടങ്ങി "എന്തിനാണു് ഇങ്ങനെയൊരു സര്‍ക്കാര്‍..." ഇല്‍ ചര്‍ച്ച അവസാനിപ്പിച്ചു് പിരിഞ്ഞു.

"മറ്റേ ഐഡിയില്‍ ആ പത്രക്കാരനെ ഒന്നു് കോണ്ടാക്റ്റ് ചെയ്യാം.ഡീറ്റെയില്‍സ് കിട്ടുമായിരിക്കും" അയാള്‍ കര്‍മ്മകുശലനായി.

യാചകന്‍

2007-10-20T22:44:00.000+03:00

സര്‍, എന്തെങ്കിലും തരണേ.
എന്തിനു് ?
മറ്റുള്ളവര്‍ക്കു് കൊടുക്കുന്നതു് കണ്ടു. അപ്പോ എനിക്കും തന്നാലെന്താ.
അവര്‍ നന്നായി പണിയെടുത്തതു് കൊണ്ടാണു് കൊടുക്കുന്നതു്.
ഓ.. എന്തു് പണി. ഇതൊക്കെ എനിക്കും പറ്റും.
പോ. പോയി പണിയെടുത്തു് തിന്നടാ.

വിവാദം വിവാഹം

2007-10-19T14:46:00.000+03:00

ഒരു കാര്യംണ്ട്. ശ്രീമതിക്കു് പതിവില്ലാത്ത മുഖവുര.
ന്താ.
രവീടെ കല്ല്യാണൊറപ്പിച്ചു.
രവി അവളുടെ അമ്മായിയുടെ മകനാണു്. പ്രത്യേകിച്ചു് പണിയൊന്നൂല്ല്യ. അമ്മാവനു് ഗള്‍ഫില്‍ ബിസ്സിനസ്സായതു് കൊണ്ടു് അവിടേയ്ക്കു് ഉടനെ പറക്കാനുള്ള തയ്യാറെടുപ്പിലുമാണു്. പെട്ടെന്നെന്താ ഒരു കല്ല്യാണക്കാര്യം.
ന്തേ, പെട്ടെന്നിപ്പോ.
അവനിപ്പോ കെട്ടണത്രേ. ആ പെണ്ണിന്റെ കാര്യറിഞ്ഞിട്ടു് നിക്കൊരു സമാധാനൂല്യ.
ന്താ. അവള്‍ക്കെന്താ പ്രശ്നം.
ഒരുത്തന്റെ കൂടെ ഒളിച്ചോടിപ്പോയാളാത്രേ. ഒന്നല്ല. മൂന്നു് വട്ടം. മൂന്നു് വട്ടോം അവളുടെ വീട്ടുകാര്‍ പോയി പിടിച്ചോണ്ടും വന്നു. അവനിപ്പോ അവളെ മതീന്നു്. നാട്ടുകാര് കളിയാക്കൂലേ.
ന്നട്ട് അവളീ കല്യാണത്തിനു് സമ്മതിച്ചോ ?
സമ്മതിച്ചിട്ടുണ്ടാവും. അല്ലാതെ ഇതു് ഒറപ്പിക്ക്വോ.
അവളെ എങ്ങന്യാ അവനു് പരിചയം ?
എങ്ങനേണാവോ . ന്തായാലും അവര്‍ക്കു് പൂത്ത കാശുണ്ട്. ഒറ്റമോളൊള്ളു. അതു് കണ്ടട്ടേരിക്കും അവന്‍..
നിനക്കു് നല്ലതു് വിചാരിച്ചൂടെ. അവളുടെ വിഷമം കണ്ടിട്ടു് അവളെ ശരിക്കും ഇഷ്ടപ്പെട്ടിട്ടായ്ക്കൂടേ അവന്‍ കെട്ടുന്നതു്. അങ്ങനെയെങ്കില്‍ അവനെ അഭിനന്ദിക്കുകയല്ലേ വേണ്ടതു്, നമ്മളില്‍ പലര്‍ക്കും ഉള്ള കപടസദാചാരചിന്തകള്‍ അവനില്ലാത്തതിനു്.
ദേ വിശ്വേട്ടാ, വേണ്ടാട്ടോ. എല്ലാരേം ഒരുതരം പുണ്യാളന്മാരാക്കല്. ഞാനിനി ഒരു കാര്യോം പറയൂല്ല.

കറി ഉപ്പ്

2007-10-18T23:56:00.000+03:00

എന്താ കുഞ്ഞമ്മേ ഇതു് ? ഇതെന്തു് കറിയാ ? വായില്‍ വെക്കാന്‍ പറ്റുന്നില്ലല്ലോ .

ഡാ ഡാ വേണ്ടെങ്കി മതിയാക്കു്. ഇതു് കഴിച്ചേച്ചും നിന്റെ ചിറ്റപ്പന്‍ പറഞ്ഞതു് നന്നായിട്ടുണ്ടെന്നാ.

കുഞ്ഞമ്മ കഴിച്ചാരുന്നോ. ഒന്നു കഴിച്ചേച്ചും പറ

ശരിയാണല്ലോ , ഉപ്പ് കയ്ക്കുന്നുണ്ടല്ലോ. ആ മനുഷ്യനിതെന്നാ ഭാവിച്ചാ. ഉപ്പു് കൂടിയ വിവരം ഒന്നു് പറഞ്ഞു്കൂടായോ . മോനിരി. ഞാന്‍ കുറച്ചു് തേങ്ങാപ്പാലും ഒക്കെയൊഴിച്ചു് കറിയൊന്നു് നീട്ടിത്തരാം.

വെറുതെയാണോ ചിറ്റപ്പന്‍ പറയാഞ്ഞതു്. ആ തേങ്ങാപ്പാലും കൂടി കളയേണ്ടെന്നു് കരുതീട്ടാവും.

സീഡി

2007-10-18T17:12:00.000+03:00

ചേട്ടാ സീഡി വേണോ ?
ചോദ്യം കേട്ടില്ലെന്നു് നടിച്ചു.
നല്ല പുതിയ ആല്‍ബംസുണ്ട്.
തീരെ താത്പര്യം കാണിക്കാന്‍ പോയില്ല.
പുതിയ സിനിമകളുണ്ടു്.
ഹേയ്, വ്യാജസീഡിയൊന്നും വേണ്ട സുഹൃത്തേ.- സാമൂഹികപ്രതിബദ്ധത പുറത്തിറക്കി തടുത്തു.
എന്നാല്‍ മറ്റവനുണ്ടു് ,ഷക്കീല. ഗുലാനിറക്കി. ഇനി രക്ഷയില്ല. ആളുകള്‍ ശ്രദ്ധിക്കുന്നുമുണ്ട്.ഇപ്പോള്‍ എന്തായാലും വാങ്ങാന്‍ പറ്റില്ല. സദാചാരകാര്‍ഡിറക്കേണ്ടി വരും.
സുഹൃത്തേ, കുടുംബമായി താമസിക്കുന്നതാണു്.വല്ല കാര്‍ട്ടൂണുകളോ മറ്റോ ഉണ്ടോ എന്നു് നോക്കു്. പിന്നെ തന്റെ നമ്പര്‍ തന്നേക്കു്. ആവശ്യമുണ്ടെങ്കില്‍ വിളിക്കാം.

അവന്റെയൊരു ഷക്കീല ! മള്‍ട്ടിവിഷന്‍ ചാനല്‍ കമ്പ്യൂട്ടറില്‍ മിന്നിമറയുമ്പോള്‍ അയാള്‍ ഓര്‍ത്തു.

ഉപകാരസ്മരണ

2007-10-17T23:45:00.000+03:00

നട്ടുച്ച. പൊള്ളുന്ന വെയില്‍. കാര്‍ പാര്‍ക്കു് ചെയ്തിരുന്നിടത്തേക്കു് നടന്നു. കൂളിംഗ് ഗ്ലാസെടുക്കാഞ്ഞതു് കഷ്ടമായി. നേരെ നോക്കാന്‍ പോലും പറ്റുന്നില്ല. എങ്ങനെയോ കാറിലെത്തി. സ്റ്റാര്‍ട്ടാകുന്നില്ല. പതിവില്ലാത്തതാണു്. തള്ളേണ്ടി വരും. പുറത്തിറങ്ങി നോക്കി. വെയിലില്‍ നില്‍ക്കാന്‍ പറ്റുന്നില്ല. അപ്പോഴതാ രണ്ടു് സ്വദേശി ചെറുപ്പക്കാര്‍. സഹായമഭ്യര്‍ത്ഥിച്ചു അറിയാവുന്ന അറബിയില്‍. "നീ കേറിക്കോ" അവര്‍ തള്ളിത്തന്നു. പെട്ടെന്നു് തന്നെ സ്റ്റാര്‍ട്ടായി. നന്ദി പറഞ്ഞപ്പോള്‍ ഒരുത്തന്‍ പ്രതികരിച്ചു "എനി റ്റൈം".
"അങ്ങനെ വരട്ടെ, വിദ്യാഭ്യാസമുള്ളവരായതു് കൊണ്ടാണു് സഹായിച്ചതു്. അല്ലെങ്കില്‍ ഇവമ്മാരൊക്കെ ഇങ്ങനെ പെരുമാറുമോ" ആത്മഗതവുമായി വണ്ടി വിട്ടു.

ചീത്തക്കാലം

2007-10-16T13:25:00.000+03:00

"സാറിനു് ചീത്തക്കാലമാണെന്നു് തോന്നുന്നല്ലോ"
നാട്ടിലേക്കു് പുറപ്പെടാന്‍ തയ്യാറെടുക്കുന്ന മേലുദ്ധ്യോഗസ്ഥനെ സന്ദര്‍ശിക്കുകയായിരുന്നു അയാള്‍.
"എന്താടോ അങ്ങനെ പറയുന്നതു്"
"അല്ല, നാട്ടില്‍ ഭാര്യയ്ക്കു് ഓപ്പറേഷന്‍, കഴിഞ്ഞയാഴ്ച താങ്കളുടെ വണ്ടി ആക്സിഡന്റായി. കഴിഞ്ഞദിവസം ഒരു കത്തിക്കുത്തില്‍ ചെറുതെങ്കിലും ഒരു പരിക്കും"
"നീ ചെറുപ്പമാണു്. കാര്യങ്ങള്‍ ഇത്ര നെഗറ്റീവായല്ല കാണേണ്ടതു്. ഭാര്യയുടെ ഓപ്പറേഷന്‍ പ്രശ്നങ്ങളൊന്നുമില്ലാതെ കഴിഞ്ഞു. ഇനിയവള്‍ക്കു് സുഖമായിരിക്കുമല്ലോ. ആ വേസ്റ്റ് ബിന്നില്‍ ഇടിക്കുന്നതിനു് പകരം വല്ല ആളുകളേയോ വണ്ടികളേയോ ഇടിക്കുകയായിരുന്നെങ്കിലോ എന്റെ വണ്ടി. അവിടെയായിരുന്നെങ്കില്‍ ധാരാളം ട്രെയിലറുകള്‍ നിരന്നുകിടന്നിരുന്നു. അതിലൊന്നിന്റെ നേരെയെങ്ങാനുമായിരുന്നു എന്റെ വണ്ടിയുടെ യാത്രയെങ്കില്‍ ഇപ്പോള്‍ ഈ സംസാരം തന്നെയുണ്ടാവില്ലായിരുന്നു. ഉറങ്ങിപ്പോയതു്കൊണ്ടല്ലേ അപകടമുണ്ടായതു്. പിന്നെ ഇന്നലത്തെ കാര്യം. അത്രയും വലിയ അടിപിടിയുണ്ടായിട്ടും ഒരു ചെറിയ മുറിവല്ലേ ഉണ്ടായുള്ളു. എന്റെ ഫോണും പോയില്ല. ഇതൊക്കെ ദൈവത്തിന്റെ ഒരു കാവലുള്ളതു്കൊണ്ടാണു് എന്നു് തിരിച്ചറിയണം. അതിനു് നമ്മള്‍ നന്ദി പറയുകയാണു് വേണ്ടതു്. അല്ലാതെ നമുക്കു് എന്തെങ്കിലും ചെറിയ ബുദ്ധിമുട്ടു് വരുമ്പോ ദൈവത്തെ പഴിക്കരുതു്. ചീത്തക്കാലമാണു് എന്നും കരുതരുതു് "

"ഓ പിന്നേ, ഒരു ഫോര്‍മാലിറ്റിയ്ക്കു് കുശലം പറഞ്ഞപ്പോ മനുഷ്യനെ ഉപദേശിച്ചു് കൊല്ലുന്നോ" വാക്കുകള്‍ പുറത്തു്വന്നില്ല . ബോസല്ലേ.

കഥ

2007-10-16T13:06:00.000+03:00

ഞാനൊരു കഥ പറയട്ടെ - അവന്‍ അവള്‍ക്കെഴുതി. ഫോണ്‍ നമ്പറോ തപാല്‍ വിലാസമോ കയ്യിലില്ല. ഇനിയും മലയാളവാക്കില്ലാത്ത ഒരു ഈമെയില്‍ സന്ദേശം.
അവള്‍ ഓഫീസില്‍ തന്നെയെന്നറിയിച്ചു് കൊണ്ട് ഉടനെ മറുസന്ദേശം - പറയൂ.
കഥ കുറച്ചായപ്പോള്‍ അവള്‍ എഴുതി - മതി ഇതൊരു പൈങ്കിളിയാണു്. എനിക്കിതിനു് സമയം കളയാനാവില്ല.
അവന്‍ എഴുതി - ആയിരിക്കാം. പക്ഷെ ഇതെന്റെ കഥയാണു്. ഇതു് മാറ്റിയെഴുതാനാവില്ല. ഇതു് നിന്റെ കഥയാവാതിരിക്കട്ടെ.
അവള്‍ - ഞാന്‍ ഒളിക്കുന്നില്ല. ഇതു് എന്റെയും കഥയാണു്. നിന്നോടു് അതു് സമ്മതിക്കാന്‍ എനിക്കു് മടിയുണ്ടാവേണ്ട കാര്യമില്ലായിരുന്നു. തുടരൂ.
കഥ കഴിഞ്ഞപ്പോള്‍ അവള്‍ എഴുതി - ഇതെന്നെക്കുറിച്ചല്ല എന്നെനിക്കറിയാം. പക്ഷെ എന്നെ ഞാനതില്‍ കാണുന്നു. അതു്കൊണ്ടാവും നീയിതു് എന്നോടു് പറഞ്ഞതു്. എനിക്കു് ഒരു തീരുമാനമെടുക്കാന്‍ സഹായിക്കാന്‍.
അവന്‍ - അല്ല എനിക്കു് ഒരു സ്ത്രീപക്ഷനിരീക്ഷണം ആവശ്യമായിരുന്നു. നിന്റെ സഹായം അഭ്യര്‍ത്ഥിക്കാനാണു് എഴുതിയതു്.
അവള്‍ അത്ഭുതപ്പെട്ടു - മാതൃകാദമ്പതികള്‍ക്കു് മറ്റൊരാളുടെ സഹായം ആവശ്യമെന്നോ.
അവന്‍ - എന്തിനും ഒരു പുറംകാഴ്ച വേണ്ടേ. മറ്റൊരു ആങ്കിള്‍. പരമാവധി ആങ്കിളുകള്‍ വേണം എന്ന പക്ഷക്കാരനാണു് ഞാന്‍. ഇതു് പക്ഷെ നാട്ടുകാര്‍ക്കു് ചര്‍ച്ച ചെയ്യാന്‍ കൊടുക്കാന്‍ പറ്റില്ലല്ലോ.

സുന്ദരി

2007-10-15T12:47:00.000+03:00

അവളുടെ ചിരിയാണെന്നെ ആദ്യം ആകര്‍ഷിച്ചതു്. വെളുത്ത നിറവും ഒരു ഘടകമായിരുന്നിരിക്കണം. പല അവസരങ്ങളിലും അടുത്തിടപഴകാന്‍ കഴിഞ്ഞപ്പോള്‍ അവളുടെ സ്വഭാവനൈര്‍മ്മല്യം കൊണ്ടു് അവളെന്നെ കീഴടക്കി. ഒരിക്കലും അവളെ സ്വന്തമാക്കാന്‍ കഴിയില്ലെന്നറിഞ്ഞിട്ടും അവളെ സ്നേഹിക്കാതിരിക്കാന്‍ എനിക്കു് കഴിഞ്ഞില്ല. അവളോടതു് തുറന്നു്പറയാനുള്ള കഴിവെനിക്കില്ലായിരുന്നു എന്നതായിരുന്നു സത്യം.
രണ്ടും കല്‍പിച്ചു് പിന്നീടു് തുറന്നു് പറഞ്ഞപ്പോഴോ അവള്‍ വേദനയോടെ ചിരിച്ചു. പിന്നെ കണ്ണടച്ചു. മുഖത്തു് അങ്ങിങ്ങ് ചുളിവുകള്‍ കാണപ്പെട്ടിരുന്നെങ്കിലും അവള്‍ അപ്പോഴും സുന്ദരി തന്നെയായിരുന്നു.

ചെരുപ്പ്

2007-10-14T03:05:00.000+03:00

മുതലാളി വേലക്കാരനോടു് : എടാ എനിക്കൊരബദ്ധം പറ്റി. ഞാന്‍ അപ്പുറത്തെ വീട്ടില്‍ പോയി വന്നപ്പോള്‍ ചെരുപ്പുകള്‍ മാറിപ്പോയി. നീ കണ്ടില്ലേ ഒന്നു നീല ഒന്നു കറുപ്പ്. ഇതു് കൊണ്ടുപോയി രണ്ടു് നീലയെടുത്തുകൊണ്ടു് വാ.
വേലക്കാരന്‍ പോയി വന്നശേഷം: അവിടേം ഒരു നീലേം ഒരു കറുപ്പും മാത്രമേയുള്ളു മുതലാളീ.

കുട്ടിയും ദൈവവും

2007-10-14T02:51:00.000+03:00

കുട്ടി: അമ്മേ എനിക്കു് Boy ഉണ്ണി‍ മതി.
അമ്മ: അതൊക്കെ ദൈവമല്ലേ മോളേ തീരുമാനിക്കുന്നതു്. മോള് ഈശ്വരനോടു് പ്രാര്‍ത്ഥിക്കു്.
കുട്ടി: അതിനു് ഈശ്വരനു് അറിയില്ലേ ഇവിടെ Two girls ആണെന്നു്.

കൈക്കൂലി

2007-10-14T00:05:00.000+03:00

"ഉംറ വിസയ്ക്ക് എന്റെ മാതാപിതാക്കള്‍ വരുന്നുണ്ട്. എനിക്കു് പോകാന്‍ ഒരു നിവൃത്തിയുമില്ല. നീയൊന്നു് പോയി വിളിച്ചോണ്ട് വരണം" ആത്മാര്‍ത്ഥസുഹൃത്തിന്റെ അഭ്യര്‍ത്ഥന. തട്ടാന്‍ പറ്റില്ല. ധാരാളം "പഞ്ഞി" കൊണ്ടുപോകാറുള്ള ആളാണു്. മാത്രമല്ല ഈ വരുന്നവര്‍ക്കു് തന്നെ വലിയ കാര്യവുമാണു്.
പ്രസാദ് വണ്ടിയെടുത്തു് എയര്‍പോര്‍ട്ടിലേക്കു് പോയി. ഒരു വെള്ളിയാഴ്ച നശിപ്പിച്ചതിനു് സുഹൃത്തിനെ മനസാ പ്രാകി. എയറിന്ത്യ പതിവു് തെറ്റിച്ചില്ല. നാലു് മണിക്കൂര്‍ ലേറ്റ്. പരിഭ്രമത്തോടെ വന്ന വയസ്സായവരെ സ്വീകരിച്ചു് പുറത്തേക്കു് വരുമ്പോള്‍ ഒരുത്തന്‍ വന്നു് പാസ്‌പോര്‍ട്ട് കാണിക്കാന്‍ പറഞ്ഞു. കാണിച്ചപ്പോ അതു് വാങ്ങിക്കൊണ്ടു് , ഒരു സ്ഥലം ചൂണ്ടി അവിടെപ്പോയിരിക്കാന്‍ പറഞ്ഞു. അവരെയും കൊണ്ടു് അവിടെപ്പോയി നിന്നു. മുമ്പും സുഹൃത്തുക്കളുടെ കൂടെ വന്നു് ഇത്തരം അനുഭവമുണ്ടായിട്ടുള്ളതു് കൊണ്ടു് പ്രസാദിനു് പാസ്‌പോര്‍ട്ടിന്റെ കാര്യത്തില്‍ വേവലാതിയുണ്ടായിരുന്നില്ല. പക്ഷേ വയസ്സായവര്‍ക്ക് അങ്ങനെയല്ലല്ലോ. ആകെയുള്ള കച്ചിത്തുരുമ്പാണു് പാസ്‌പോര്‍ട്ട്. അതാണു് കൈവിട്ടു് പോയിരിക്കുന്നതു്. പ്രസാദ് സമാധാനിപ്പിച്ചു. നിങ്ങള്‍ പടച്ചവന്റെ വിളികേട്ടു് വന്നവരാണു്. ധാരാളം ക്ഷമ വേണ്ടി വരും.
അര മണിക്കൂര്‍ നേരമേ ക്ഷമിക്കേണ്ടി വന്നുള്ളു. ഒരാള്‍ വന്നു് പേരു് വിളിച്ചു, ഒരു വണ്ടിയില്‍ കേറിക്കൊള്ളാന്‍ പറഞ്ഞു. അവര്‍ മക്കയില്‍ കൊണ്ടാക്കും പോലും. പ്രസാദ് പറഞ്ഞു "എന്റെ ഉമ്മയും ബാപ്പായുമാണു്. ഞാനവരെ കൊണ്ടുപോയ്ക്കൊള്ളാം". എന്നാല്‍ അതൊക്കെ മക്കയില്‍ ചെന്ന ശേഷം തീരുമാനിക്കാമെന്നായി അവര്‍. അവരുടെ കര്‍ത്തവ്യനിര്‍വ്വഹണത്തിനു് വിലങ്ങുതടിയാവരുതെന്നു് അവര്‍ പറഞ്ഞു.
"തനിക്കു് മക്കയില്‍ പോകാന്‍ പറ്റില്ലെന്നു് ഇവമ്മാരോടു് പറയാന്‍ പറ്റില്ലല്ലോ" പ്രസാദ് കുഴഞ്ഞു. അതിലൊരുത്തനെ വിളിച്ചു മാറ്റി നിര്‍ത്തി പ്രസാദ് പറഞ്ഞു "എന്റെ കയ്യില്‍ അമ്പതു് റിയാലേ ഉള്ളു. ഇതു് ഞാന്‍ നിനക്കു് തരാം. എനിക്കു് നീ അവരുടെ പാസ്‌പോര്‍ട്ട് തരണം. എന്റെ ഭാര്യയും കുട്ടികളും അവരെ കാണാന്‍ ഉറങ്ങാതെ കാത്തിരിക്കുകയാണു്. നിന്നെ ദൈവം അനുഗ്രഹിക്കും".

ശരി, ദൈവത്തിന്റെ അനുഗ്രഹമായ ആ അമ്പതു്റിയാല്‍ തന്നിട്ടു് നീ അവരെയും കൊണ്ടു് പൊയ്ക്കോളൂ. നിന്റെ ഫോണ്‍നമ്പര്‍ തന്നേക്കൂ. സുഹൃത്തിന്റെ ഫോണ്‍ നമ്പര്‍ അവനു് കൊടുത്തു് പാസ്‌പോര്‍ട്ടും വാങ്ങി വയസ്സായവരേയും കൊണ്ടു് പ്രസാദ് മടങ്ങി.
പോകുന്ന വഴി കാരണവര്‍ ചോദിച്ചു " എന്താ മോനേ പ്രശ്നം".
"ഒന്നുമില്ല" പ്രസാദ് പറഞ്ഞു "പൈസ മേടിക്കാന്‍ ഓരോ അടവുകള്‍."
"നീ കൊടുക്കാന്‍ പോയിട്ടല്ലേ" കാരണവര്‍ക്കു് ചോദിക്കണമെന്നുണ്ടായിരുന്നു.

മന്ത്രമോതിരം

2007-10-12T14:10:00.000+03:00

സര്‍ ഈ മോതിരം ധരിച്ചാല്‍ എല്ലാ കഷ്ടപ്പാടും മാറും. പ്രശസ്തമായ തീര്‍ത്ഥാടനകേന്ദ്രം. അവിടെ ചുട്ടു പൊള്ളുന്ന വെയിലത്തു് വില്‍പ്പനക്കാരന്റെ സംഭാഷണത്തില്‍ കൗതുകം തോന്നി.
എനിക്കിപ്പോള്‍ കഷ്ടപ്പാടൊന്നുമില്ലല്ലോ സുഹൃത്തേ. അവനെയൊന്നു് പരീക്ഷിക്കാന്‍ തന്നെ തീരുമാനിച്ചു.
സര്‍, ഇവിടെവരെ വന്നിട്ടു് ഇതു് വാങ്ങാതെ പോയാല്‍ ദൈവകോപമുണ്ടാകും. അവന്‍ ലൈന്‍ മാറ്റി.
അയ്യോ, ദൈവകോപം എന്തായാലും വേണ്ട. എത്രയാ ഇതിന്റെ വില ?
ശരിക്കും അമ്പതു് രൂപയാണു്, സാറിനായതു്കൊണ്ടു് നാല്‍പതിനു് തരാം.
അതവിടെ നില്‍ക്കട്ടെ, ഈ പണി ചെയ്താല്‍ നിനക്കെന്തു് കിട്ടും ഒരു ദിവസം?
സര്‍, അതു് ബിസിനസ് വിഷയം . എന്നാലും പറയാം. ഒരു നൂറ്റമ്പതു് രൂപ കിട്ടും. അതു് തന്നെ മൂന്നായി ഭാഗിക്കുകയും വേണം - ചെറുക്കന്‍ സഹതാപലൈന്‍ വര്‍ക്കൌട്ട് ചെയ്യാന്‍ തുടങ്ങി.
നീയൊരു മണ്ടന്‍ തന്നെ. നിനക്കൊരു മോതിരം അങ്ങ് വിരലിലിട്ടാല്‍ പോരേ. നിന്റെ കഷ്ടപ്പാടൊക്കെ മാറുകയില്ലേ. ഒരു കാര്യം ചെയ്യാം, നീ നാല്‍പ്പതു് രൂപയ്ക്ക് ഒരു മോതിരം തരൂ. ഞാനതു് നിനക്കു് തരാം. നിനക്കാണല്ലോ കഷ്ടപ്പാടു്. അതു് മാറുകയും ചെയ്യും. എനിക്കു് ദൈവശാപം കിട്ടുകയുമില്ല.

നിനക്കു് ജോലി വേണമെങ്കില്‍ എന്നെ ഓഫീസില്‍ വന്നു് കാണൂ. നൂറ്റമ്പതു് രൂപ ദിവസം ഞാന്‍ തരാം. ഇതാ എന്റെ കാര്‍ഡ്. വരട്ടെ.

ഇന്ത്യെന്ത് ഇന്ത്യ

2007-10-11T19:48:00.000+03:00

വണ്‍സ് അപ്പോണ്‍ എ റ്റൈം...
തെങ്ങുകയറ്റക്കാരന്‍ കുമാരന്‍കുട്ടി ആദ്യമായി തൃശൂര്‍ പൂരം കാണാന്‍ പോയി. "കുമാരേട്ടോ, പൂരങ്ങെനണ്ടാര്‍ന്നൂ" തിരികെ വന്നപ്പോ ആളോള് ചോയ്ച്ചു.
ഇന്ത്യെന്ത് ഇന്ത്യ , തിച്ചൂരല്ലേ കാണണ്ടതു്. അവട റോഡ്. ഇവട റോഡ്. അമ്പലത്തിനു് ചിറ്റും റോഡ്.

പാര്‍ക്കല്‍

2007-10-11T03:46:00.000+03:00

പത്രം അരിച്ചുപെറുക്കലും ചായകുടിയും തകൃതിയായി നടക്കുന്നതിനിടെയാണു് ഗേറ്റു് തുറന്നൊരാള്‍ വരുന്നതു് കണ്ടതു്. രാവിലെ തന്നെയാരാണാവോ. പരിചയവും തോന്നുന്നില്ല.
വന്നയാള്‍ സംശയങ്ങള്‍ക്കു് വിരാമമിട്ടു. പേടിച്ചതു് പോലെ പിരിവോ , ഡയറക്റ്റ് മാര്‍ക്കറ്റിങ്ങോ ഒന്നുമല്ല. വെറും വീടു്പാര്‍ക്കല്‍ ക്ഷണം. ഈ നാട്ടില്‍ പുതിയതാണു്, അപ്പോള്‍ നാട്ടുകാരെയൊക്കെ ഒന്നു പരിചയപ്പെടണ്ടേ - ആഗതന്‍ നയം വ്യക്തമാക്കി.
അല്ല, എപ്പഴാ. എന്തെങ്കിലും ചോദിക്കണ്ടേയെന്നു് കരുതി ചോദിച്ചു.
സമയവും സ്ഥലവുമൊക്കെ കത്തിലുണ്ട്. തീര്‍ച്ചയായും വരണം.
സ്ഥലമോ ? അമ്പരപ്പ് ഒളിപ്പിക്കാന്‍ സാധിച്ചില്ല.
അതെ. പുതിയ വീടു് ഒരു പാടാളുകള്‍ ഒന്നിച്ചു്വന്നാല്‍ വൃത്തികേടാവില്ലേ. അതു്കൊണ്ട് പാര്‍ട്ടി ഹാളിലാക്കി.
വീടിന്റെ ചിത്രം ആ കത്തിലുണ്ട്.
എനിക്കെന്തെ ഇത്ര സത്യസന്ധനാവാന്‍ കഴിയാഞ്ഞതു് - അയാള്‍ ഓര്‍ത്തു. എങ്കിലും പുതിയ താമസക്കാരനെ ഒരു പൊങ്ങച്ചക്കാരനാക്കിക്കാണിക്കാന്‍ പിന്നീടു് സന്ദര്‍ഭങ്ങള്‍ കിട്ടിയപ്പോള്‍ അയാള്‍ ഒഴിവാക്കിയതുമില്ല.

അസാധാരണം

2007-10-09T02:18:00.001+03:00

നീയെന്താ ഇങ്ങനെ ? അഹ്മദ് ചോദിച്ചു. അഹ്മദ് ഒരു സോമാലിയാണു്. കുറച്ചുകാലമായി അയാളുടെ കാര്‍ കഴുകുന്നവനാണു്.
എങ്ങനെ ? ചോദ്യം തിരിച്ചുകൊടുത്തു.
അല്ല, ഞാന്‍ കുറെയാളുകളെ കണ്ടിട്ടുണ്ട്, നിന്റെ നാട്ടുകാരെ. അവരെപ്പോലെയല്ല നീ പെരുമാറുന്നതു്.
എന്റെ ഭാഗത്തു് നിന്നു് വല്ല വീഴ്ചയും.. അയാള്‍ക്കു് ആധിയായി.
ഇല്ല. അതാണു് എന്നെ അത്ഭുതപ്പെടുത്തുന്നതു്. സാധാരണയായി നിങ്ങള്‍ ചെയ്യുന്ന ജോലിക്കു് കൂലി തരും, ചിലപ്പോള്‍ റമദാനിലോ മറ്റോ എന്തെങ്കിലും ഭക്ഷണമോ പണമോ തരും. പക്ഷെ നീ ഞങ്ങളുടെ കൂടെ ഭക്ഷണം കഴിക്കുന്നു. ഞങ്ങളെ മനുഷ്യന്മാരായി കാണുന്നു. നിന്റെ കുട്ടികളോടും അങ്ങനെ ചെയ്യാന്‍ പറയുന്നു. ഞങ്ങളുടെ ഭാഷ സംസാരിക്കാന്‍ താത്പര്യപ്പെടുന്നു. അവധി കഴിഞ്ഞു്വരുമ്പോള്‍ സമ്മാനങ്ങള്‍ കൊണ്ടുവരുന്നു. അങ്ങനെ പലതും ഞങ്ങള്‍ക്കു് പരിചയമില്ലാത്തതു്..
സോമാലികള്‍ അധികമുള്ള ആ സ്ഥലത്തു് പേടികൂടാതെ ജീവിക്കാനാണു് ഇതെല്ലാം എന്നു് മാത്രം അയാള്‍ പറഞ്ഞില്ല. പകരം അവനു് മനസ്സിലാകാന്‍ സാദ്ധ്യതയില്ലാത്ത തത്വചിന്തകളും ഗുണപാഠകഥകളും ദൈവവചനങ്ങളും വിളമ്പി.

വൃദ്ധന്‍

2007-10-07T03:38:00.000+03:00

അന്നും ആ വൃദ്ധന്‍ സലാം ചൊല്ലി. അയാള്‍ മടക്കുകയും ചെയ്തു. മാസങ്ങളായി തുടരുന്ന പതിവു്. ഓഫീസിലേക്കുള്ള വഴിയില്‍ എന്നും തുടരുന്നതു്. അന്നു് പക്ഷെ അതിനൊരു അനുബന്ധവുമുണ്ടായി. സലാം ചൊല്ലിയ വൃദ്ധനു് സലാം മടക്കിയതോടൊപ്പം പത്തു് റിയാലും ഒരാള്‍ കൊടുക്കുന്നതു് കണ്ടു. താനും മോശക്കാരനാകരുതല്ലോ, അയാള്‍ ഇരുപതു് റിയാല്‍ കൊടുത്തു. വൃദ്ധന്റെ മുഖം പ്രകാശിച്ചു. അയാള്‍ ദൈവത്തെ സ്തുതിച്ചു.
പിറ്റേന്നു് മുതല്‍ അയാളുടെ വഴിയില്‍ ആ വൃദ്ധനുണ്ടായില്ല. വൃദ്ധന്‍ എവിടെയെന്നു് തലപുകയ്ക്കാനൊന്നും അയാള്‍ മെനക്കെട്ടില്ല.
കാരണം അയാള്‍ പുതിയൊരു വഴിയിലൂടെയായിരുന്നു പൊയ്ക്കൊണ്ടിരുന്നതു്.

ഫ്യൂസ് ബോക്സ്

2007-09-19T16:07:00.001+03:00

ഒന്നാം വര്‍ഷ വര്‍ക്ക് ഷോപ്പ് പരീക്ഷ. വാചാ.
ഓരോ സാധനങ്ങള്‍ കാണിച്ച് ഐഡന്റിഫൈ ചെയ്യിക്കുക. നിസ്സാരം.

ഇതെന്താണെന്നു് പറയൂ?

"ഫ്യൂസ് ബോക്സ് " പെട്ടെന്നു് തന്നെ ഉത്തരം വന്നു.

തുറന്നു് വച്ച അയണ്‍ ക്ലാഡ് ഡബ്ള്‍ പോള്‍ സ്വിച്ച് (മെയിന്‍ സ്വിച്ച് എന്നും പറയും) നോക്കി ചോദ്യകര്‍ത്താവ് അന്തിച്ചിരുന്നു.

കോളെജെന്നാ തുറക്കുക

2007-09-13T01:20:00.000+03:00

ഒരു സമരകാലം.
ടൌണില്‍ വച്ചൊരു വിദ്യാര്‍ത്ഥി അദ്ധ്യാപകനെ കണ്ടുമുട്ടുന്നു
"സര്‍, കോളെജെന്നാ തുറക്കുക എന്നു്..."
"ഓ.. എനിക്കൊരു വിവരവുമില്ലെടോ"
"അതല്ല സര്‍, കോളെജെന്നാ തുറക്കുക എന്നാ ചോദിച്ചതു്"

സാമ്പിള്‍ കോളജു് നുറുങ്ങ്

2007-09-13T01:14:00.000+03:00

കം ആന്റ് മീറ്റ് മി ഇന്‍ ദ ബാക്ക് വെന്‍ ഐയാം എംറ്റി.
Come and meet me in the back when I am empty

[പരിഭാഷ: ഞാന്‍ തിരക്കില്ലാതെയിരിക്കുന്ന സമയം (കാലിയായിരിക്കുമ്പോള്‍) പിന്നീടു് എന്നെ വന്നു് കാണൂ]

സിനിമ

2007-09-12T23:24:00.000+03:00

സിനിമാ തിയറ്ററില്‍ പതിവില്ലാത്ത തിരക്കു്. സൂപ്പര്‍സ്റ്റാര്‍ ചിത്രങ്ങളൊന്നും ഇറങ്ങിയില്ലല്ലോ, പിന്നെന്താ. പോസ്റ്ററിലെ വലിയ ചിഹ്നം ഉത്തരം തന്നു. ക്യൂവില്‍ അപ്പാപ്പന്മാരുടെ സാന്നിദ്ധ്യം അതു് വിളിച്ചറിയിക്കുന്നു. കൂട്ടുകാരെയൊന്നും കാണുന്നില്ല. നീളമുള്ള ക്യൂവിന്റെ അറ്റത്തു് നിന്നു. കൌണ്ടറിനടുത്തെത്തിയപ്പോള്‍ ,"ആ, നീയിവിടെ നില്‍പുണ്ടായിരുന്നോ ? ഒരെണ്ണം എനിക്കുമെടുത്തോ". കൂടെത്താമസിക്കുന്നവന്റെ ചേട്ടനാണു്. സൂപ്പര്‍സീനിയറുമാണു്. പുലിവാലായല്ലോ. ഈ പടമെങ്ങനെ ഇയാളുടെ കൂടെ ഇരുന്നു കാണും. എന്തെങ്കിലുമാകട്ടെ.
തിയ്യറ്ററില്‍ പടം തുടങ്ങുന്നതു് വരെ അദ്ദേഹത്തിന്റെ കത്തി സഹിച്ചിരുന്നു. തുടങ്ങിക്കഴിഞ്ഞപ്പോള്‍ അദ്ദേഹത്തിന്റെ കമന്റ് "അയ്യേ, ഈ പടമായിരുന്നോ ? ഞാനാ ദിലീപിന്റെ പടമാരിക്കുംന്നു് കരുതി.". അനുജന്റെ സുഹൃത്തിന്റെ കൂടെയിരുന്നു് ഇതെങ്ങനെ ആസ്വദിക്കുമെന്നു് വിചാരിച്ചാവും ആ പ്രസ്താവനയെന്നു് കരുതിയിരുന്നപ്പോള്‍ അടുത്തതു് "ഇതു് ഞാന്‍ രണ്ടു്ദിവസം മുമ്പെ കണ്ടതല്ലേ. വെറും വേസ്റ്റ്.എന്നാലും കാശു് കൊടുത്തു് കേറിയതല്ലേ. പോയിട്ടു് പ്രത്യേകിച്ചൊന്നും ചെയ്യാനുമില്ല."

ചാറ്റ് Chat

2007-09-09T18:27:00.000+03:00

അവള്‍: Are we doing something wrong?

അവന്‍: I don't think so. What makes you feel so?

അവള്‍: After reading those stories and ...

അവന്‍: I won't compel you. It's your decision.

അവള്‍: Okay, forget it. What about sending the photos? You promised me.

അവന്‍: So did you. It cannot be a one-way traffic anyway.

അവള്‍: You know one thing, he told me he was the luckiest person in the world

അവന്‍: He is wrong. I am the luckiest. I got the most precious person as my wife.

അവള്‍: You didn't. So says he.

അവന്‍: Okay dear, agreed. You are the perfect couple in the world.

അവള്‍: Aha . Don't think you are the perfect always.

അവന്‍: Agreed. Now I shall send the photo of my elder daughter.

അവള്‍: Then I will also send the photo of my elder daughter.

....

അവന്‍: Did you receive it ?

അവള്‍: Yes, but before opening it, let me keep my word. Accept this file.

...

അവന്‍: Hey, why did you return the photo ?

അവള്‍: I didn't.

മൊബൈല്‍ ഫോണ്‍

2007-09-08T21:10:00.000+03:00

തീവണ്ടി സ്റ്റേഷന്‍ വിട്ടു. ഒരു മൊബൈല്‍ ഫോണ്‍ മണിയടിക്കാന്‍ തുടങ്ങി. അയാള്‍ പോക്കറ്റില്‍ നിന്നും ഫോണെടുത്തു നോക്കി. തന്റേതല്ല. അടുത്തെങ്ങും ആരുമില്ലാതാനും. അപ്പുറത്തുനിന്നുമായിരിക്കും. അയാള്‍ ദിനപത്രമെടുത്തു് നിവര്‍ത്തി. ഫോണ്‍ ആരുമെടുക്കുന്നില്ല. കട്ടായ ശേഷം വീണ്ടും മണിയടി തുടങ്ങി. തന്റെ സീറ്റിനടിയില്‍ നിന്നാണതെന്നയാള്‍ക്കു് തോന്നി. ശരി തന്നെ. വിലപിടിപ്പുള്ള ഒരു ഫോണ്‍ അവകാശിയില്ലാതെ കിടക്കുന്നു. ഒരു പക്ഷെ അതിന്റെ ഉടമയായിരിക്കാം വിളിക്കുന്നതു്. അയാള്‍ ഫോണെടുത്തു "ഹലോ". "നിങ്ങളാരാ?" മറുതലയ്ക്കല്‍ ഒരു പുരുഷസ്വരം.പരുഷമായ ആ സ്വരം കേട്ടു് അയാള്‍ക്കു് ഭയം തോന്നി. "എന്റെ പേരു് കൃഷ്ണന്‍കുട്ടി. ഈ ഫോണെനിക്കു് വീണു് കിട്ടിയതാണു്. ഇതിന്റെ ഉടമസ്ഥനെ അറിയുമെങ്കില്‍ അറിയിച്ചാല്‍ നന്നായിരുന്നു." "താനൊരു പാവമാണെന്നു് തോന്നുന്നല്ലോ" അയാളുടെ സ്വരമല്‍പം മയമുള്ളതായി "സാധാരണ ഫോണൊക്കെ വീണു്കിട്ടിയാല്‍ ആളുകള്‍ ആദ്യം ചെയ്യുന്നതു് അതിന്റെ സിമ്മൊക്കെ ഊരിക്കളഞ്ഞു് ഫോണ്‍ സ്വന്തമാക്കുക എന്നതാണു്.എന്തായാലും ശരി, താങ്കളുടെ വിലാസം തരൂ. ഫോണ്‍ അവിടെ വന്നു വാങ്ങാനുള്ള ഏര്‍പ്പാടുണ്ടാക്കാം".വിലാസവും കൊടുത്തു് ഫോണെടുത്തു് അയാള്‍ ബാഗില്‍ വെച്ചു. കുറച്ചുകഴിഞ്ഞതും ഒരു യുവതി വന്നു് സീറ്റിലൊക്കെ തിരയാന്‍ തുടങ്ങി. കുറച്ചുമുമ്പ് ആ സീറ്റിലിരുന്നിരുന്നതു് അവളായിരുന്നു അയാളോര്‍ത്തു. ഒരുപക്ഷേ ഈ ഫോണ്‍ അവളുടേതായിരിക്കും. അയാളുടെ സംശയം മനസ്സിലാക്കിയെന്നവണ്ണം അവള്‍ ചോദിച്ചു "എന്റെ മൊബൈലെങ്ങാന്‍ കണ്ടായിരുന്നോ?". ഒന്നുറപ്പു് വരുത്തിയേക്കാം. അയാള്‍ കരുതി. "നമ്പറെത്രയാ".അവള്‍ പറഞ്ഞ നമ്പര്‍ അയാള്‍ തന്റെ മൊബൈലില്‍ നിന്നും അടിച്ചുനോക്കി. അതുതന്നെ. തന്റെ ബാഗില്‍ നിന്നും തന്നെയാണു് റിങ്ങ് വന്നതു്. ബാഗില്‍ നിന്നും ഫോണെടുത്തയാള്‍ അവള്‍ക്കു് കൊടുത്തു. നന്ദി പറഞ്ഞു് അവള്‍ പോയി.
പിറ്റേന്നു് വൈകുന്നേരം ഫോണ്‍ അന്വേഷിച്ച് വീട്ടില്‍ ആളു് വന്നപ്പോളയാള്‍ ഫോണ്‍ ഉടമസ്ഥയെ തിരിച്ചേല്‍പിച്ച വിവരം പറഞ്ഞു. വന്നയാള്‍ അത്ഭുതപ്പെട്ടു "ഉടമസ്ഥ തന്നെയാണല്ലോ എന്നെയിങ്ങോട്ടയച്ചതു് ! നിങ്ങള്‍ വല്ലവര്‍ക്കുമായിരിക്കും കൊടുത്തതു്." "അല്ല, എന്റെയടുത്തിരുന്ന യുവതി തന്നെ. അവര്‍ ഫോണ്‍ നമ്പര്‍ കൃത്യമായി പറയുകയും ചെയ്തു". അയാള്‍ സമ്മതിച്ചില്ല "ഉടമസ്ഥ യുവതിയല്ല, മദ്ധ്യവയസ്കയാണു്. ഇന്നലെ നിങ്ങളുടെ അടുത്തിരുന്നതാണു്. വീട്ടിലെത്തിയപ്പോഴാണു് ഫോണ്‍ നഷ്ടമായ വിവരമറിഞ്ഞതു്. അവരുടെ ഭര്‍ത്താവാണു് നിങ്ങളെ ഫോണ്‍ ചെയ്തതു് . നിങ്ങള്‍ മറ്റൊരാള്‍ക്കു് ആ ഫോണ്‍ കൈമാറുന്നതിനു് മുമ്പ് അദ്ദേഹത്തെയൊന്നു് വിളിച്ചു് ഉറപ്പു് വരുത്താമായിരുന്നു."
"ക്ഷമിക്കണം അപ്പോള്‍ എനിക്കങ്ങനെ തോന്നിയില്ല. നിങ്ങളാ നമ്പറില്‍ വിളിച്ചു് ചോദിച്ചുനോക്കൂ". പരിധിയ്ക്കു് പുറത്തെന്നു് പല്ലവി തന്നെ കിട്ടി.
ഇനിയെന്തു് എന്നാലോചിച്ചു വിഷമിച്ചിരിക്കുമ്പോഴാണു് അവളുടെ കോള്‍ വന്നതു് ഒരു പുതിയ നമ്പറില്‍ നിന്നു് "താങ്കള്‍ക്ക് ഒരിക്കല്‍ കൂടി നന്ദി പറയാനാണു് വിളിച്ചതു്. പിന്നെ, താങ്കളെ ഒന്നു് പരിചയപ്പെട്ടാല്‍ കൊള്ളാമെന്നുണ്ടു്. താത്പര്യമുണ്ടെങ്കില്‍ സമയവും സ്ഥലവും പറഞ്ഞാല്‍ മതി". നമ്പര്‍ വിരുന്നുകാരനു് കൊടുത്തു് വിവരവും പറഞ്ഞു് അയാള്‍ അകത്തു് പനിച്ചു്വിറച്ചു് കിടക്കുന്ന മകളുടെ അടുത്തേക്കു് നടന്നു.

കുസൃതി

2007-09-07T10:20:00.000+03:00

क्या करॆं क्या न करॆं ये कैसी मुश्किल है
कॊई तॊ बता दॆ इस का हल ऒ मॆरि...

എന്നു് മുഴുമിക്കാത്ത കുറിപ്പ് അവള്‍ക്കുള്ള ബര്‍ത്ത്ഡേ കാര്‍ഡില്‍
എഴുതിയപ്പോള്‍ അവന്‍ കുസൃതി മാത്രമേ ഉദ്ദേശിച്ചിരുന്നുള്ളൂ.
ബിരുദപഠനം മുഴുമിച്ച ശേഷം അവളെ കണ്ടിട്ടുമില്ല. ഫോണ്‍ ആര്‍ഭാടമായിരുന്ന കാലവും. ഒന്നിച്ചുണ്ടായിരുന്ന സുഹൃദ്സംഗമങ്ങളില്‍ തന്നെ ഇഷ്ടമാണെന്ന സൂചന തരാന്‍ അവള്‍ ശ്രമിക്കാതെയിരുന്നിട്ടുമില്ല. അല്ലെങ്കിലും തന്നെയാര്‍ക്കാണു് ഇഷ്ടപ്പെടാതിരിക്കാന്‍ കഴിയുക. കഴിയുന്നതും ഗ്യാപ്പിട്ടു് തന്നെ പെരുമാറി. ഒരേ ജാതി മതം, സാമൂഹിക സാമ്പത്തിക ചുറ്റുപാടുകള്‍. ഒട്ടിയാല്‍ വിട്ടു് പോരുക അസാദ്ധ്യം. പക്ഷെ ഒന്നല്ല മൂന്നാണു് വൈക്കോല്‍ ലോറികള്‍ മുന്നിലുള്ളതു്. വെറുതെ അവളെ കാത്തിരുത്തുന്നതില്‍ അര്‍ത്ഥമില്ല. അതുകൊണ്ടും കൂടിയാണു് പിന്മാറിയതു്. പക്ഷെ രംഗീല കണ്ടതും ജന്മദിനം വന്നതും അടുത്തടുത്തായതു് കൊണ്ടു് ഒരു കുസൃതി തോന്നി അവ കുറിച്ചുവെന്നു് മാത്രം. തന്നെയുമല്ല അവളെ ഇനി എന്നു് കാണാനാണു്.
പക്ഷെ പിന്നീട് തൊഴിലധിഷ്ഠിത ഡിപ്ലോമയില്‍ കൂടെ പഠിച്ചിരുന്ന മറ്റൊരുവളോടൊപ്പം അവളുടെ മുന്നില്‍ പോയി ചാടേണ്ടിവന്നു."ആ കുട്ടി നിന്റെ കാമുകിയായിരുന്നോ" എന്നു് പുതിയ കൂട്ടുകാരി തിരക്കിയപ്പോഴാണു് "ആയിരുന്നു" എന്നു് അവനു് മനസ്സിലായതു്. പിറ്റേന്നു് അവളെ തിരക്കി ഹോസ്റ്റലില്‍ ചെന്നപ്പോള്‍ അവള്‍ നാട്ടില്‍ പോയെന്നറിഞ്ഞു. പ്രേമിച്ചു വഞ്ചിച്ചതിനു് അവളുടെ സുഹൃത്തുക്കളുടെ ശകാരവും കേട്ടു. താനിതു്വരെ പ്രേമിച്ചില്ലായിരുന്നെന്നും ഇപ്പോഴാണു് അതു് തുടങ്ങിയതെന്നും അവന്‍ പറഞ്ഞതു് അവര്‍ക്കു് തികച്ചും അവിശ്വസനീയമായിരുന്നു. തന്റെ പുതിയ വിലാസവും ഫോണ്‍ നമ്പറും അവള്‍ക്കു് കൊടുക്കാന്‍ വേണ്ടി അവരെ ഏല്‍പിച്ചു. അതുകൊണ്ടൊരു ഗുണവുമുണ്ടായി. അവളുടെ വിവാഹക്ഷണക്കത്തു് കൃത്യമായി കൈപ്പറ്റാന്‍ കഴിഞ്ഞു.

കത്ത്

2007-08-28T20:22:00.001+03:00

വീടു് വൃത്തിയാക്കുന്നതിനിടെയാണു് ആ കത്തു് കിട്ടിയതു്. തുറക്കാത്ത കത്തു് . അയച്ചതാരെന്നു് സൂചനയില്ല. ഒരു വന്‍നഗരത്തില്‍ നിന്നുമയച്ചതാണെന്നു് തപാല്‍ സ്റ്റാമ്പ് സാക്ഷ്യപ്പെടുത്തുന്നു.
തനിക്കുള്ള കത്തായതു്കൊണ്ടു് തുറക്കാനാരുടേയും സമ്മതം വേണ്ടല്ലോ.
തുറക്കേണ്ടിയിരുന്നില്ലെന്നു് തോന്നി. എന്തുമാത്രം അപവാദങ്ങളാണു് തന്റെ ഭാര്യയെക്കുറിച്ചു് ആ പേരില്ലാത്തവന്‍ തട്ടിവിട്ടിരിക്കുന്നതു്. അവള്‍ അവന്റെയാണു് പോലും !
കത്തിന്റെ പഴക്കം കണക്കുകൂട്ടിയപ്പോള്‍ പക്ഷേ അയാള്‍ക്കു് ചിരി വന്നു. നീണ്ട മുപ്പതു് വര്‍ഷം തന്റെ കൂടെ കഴിഞ്ഞവളെപ്പറ്റിയാണു് അവന്റെയൊരു അവകാശവാദം !
ആ പേരു് വെളിപ്പെടുത്താന്‍ പോലും ധൈര്യമില്ലാത്തവനില്‍ നിന്നും അവളെ രക്ഷിച്ച ദൈവത്തെ അയാള്‍ സ്തുതിച്ചു.

സൂക്ഷ്മത

2007-08-17T17:17:00.000+03:00

"ലെച്ചിപ്പോതാമാ ?"
ചോദ്യം കേട്ടു് അവന്‍ മിഴിച്ചുനോക്കുന്നതു് കണ്ടപ്പോള്‍ അവള്‍ ചോദിച്ചു "ഷാല്‍ വി എലോപ്പ് ?"
"ഈ കുട്ടിക്കിതെന്തുപറ്റി !" അവന്‍ അത്ഭുതപ്പെട്ടു.
പരിചയപ്പെട്ടിട്ടു് ആഴ്ചകളേ ആയിട്ടുള്ളൂ. ഒളിച്ചോടാന്‍ തക്ക എന്തുണ്ടായി.
"വൈ ? വാട്ട് ഹാപ്പന്‍ഡ് ?"
"നതിങ്. ഐ വാസ് ജസ്റ്റ് ടീസിങ് യു"
മറുനാടന്‍ പെണ്‍കുട്ടി. അടുപ്പം കാട്ടിയതു് അബദ്ധമായോ. പാഠ്യഭാഗങ്ങള്‍ പറഞ്ഞുകൊടുത്തതും കോഴ്സ് തുടരാന്‍ ധൈര്യം കൊടുത്തതും പ്രശ്നമായോ. മറുനാടന്‍ കുട്ടികളൊക്കെ ഇങ്ങനെയാണെന്നു് കേള്‍ക്കുന്നതു് നേരോ.. എങ്കില്‍ സൂക്ഷിക്കണമല്ലോ. അവന്‍ നിശ്ചയിച്ചു.
പിന്നീടു് പല പ്രാവശ്യം അവളോടൊപ്പം സിനിമയ്ക്ക് പോയപ്പോഴും തീവണ്ടിയാത്രകള്‍ ചെയ്തപ്പോഴും സുഖവാസകേന്ദ്രങ്ങള്‍ സന്ദര്‍ശിച്ചപ്പോഴും അവന്‍ സൂക്ഷിച്ചുകൊണ്ടേയിരുന്നു.

പ്രണയം

2007-08-13T22:00:00.001+03:00

അന്നും എന്തോ സമരമായിരുന്നു. കൂട്ടുകാരൊക്കെ സിനിമയ്ക്ക് പോയി. ആ വളിപ്പ് സിനിമ മുമ്പു് കണ്ടിട്ടുള്ളതു് കൊണ്ടു് അവന്‍ ഒഴിഞ്ഞു. മാത്രവുമല്ല, അവമ്മാരുടെ ശല്യമില്ലാതെ ലേഡീസ് ഹോസ്റ്റലില്‍ പോയി ഒലിപ്പിച്ചുകൊണ്ടിരിക്കാം. പോകാന്‍ റെഡിയായിക്കൊണ്ടിരിക്കുമ്പോഴാണു് കോളിങ്ബെല്‍ ശബ്ദിച്ചതു്. ചെന്നു് നോക്കിയപ്പോള്‍ അടുത്ത വീട്ടിലെ പെണ്‍കുട്ടി. കയ്യിലൊരു കാസറ്റും. "ഇതൊന്നു ശരിയാക്കിത്തരാമോ". അപ്പോഴാണു് അതിന്റെ വള്ളി പുറത്തേക്കു് കിടക്കുന്നതവന്‍ ശ്രദ്ധിച്ചതു്. "ഇതിപ്പോ ഇവള്‍ക്കു് തന്നെയങ്ങ് ശരിയാക്ക്യാപ്പോരേ" തോന്നല്‍ മനസ്സിലൊതുക്കി അതു്വാങ്ങി അകത്തു്പോയി ശരിയാക്കി വന്നു. ഹൌസ് ഓണറുടെ മകളാണു്. ക്രിക്കറ്റ് കാണാന്‍ സ്ഥിരമായി പോകുന്ന വീടുമാണു്. പിണക്കേണ്ട കാര്യമില്ല. കാസറ്റ് വാങ്ങിയിട്ടും പോകാതെ കണ്ടപ്പോള്‍ ചോദിച്ചു "സ്കൂളില്‍ പോയില്ലേ ഇന്നു് ?". "പോയാല്‍ പിന്നെ ഇവിടെ കാണുമോ" എന്നു ചോദിച്ച് അവള്‍ ഓടിപ്പോയി.
പിന്നീടും പല ദിവസങ്ങളില്‍ അവള്‍ വന്നു. ഓരോരോ നിസ്സാരകാര്യങ്ങളും പറഞ്ഞ്. അവന്‍ വളരെ മാന്യമായിത്തന്നെ പെരുമാറിയും കൊണ്ടിരുന്നു.പിന്നീടാ വരവു് നിന്നു.
അങ്ങനെയിരിക്കെ ഒരു കത്തു് . അവള്‍ എഴുതിയിരിക്കുന്നു.
"എനിക്കു് നിങ്ങളെ ഇഷ്ടമാണു്. നിങ്ങള്‍ ഒറ്റയ്ക്കുള്ളപ്പോള്‍ ഓരോ കാരണങ്ങളുണ്ടാക്കി ഞാന്‍ വന്നിരുന്നതോര്‍മ്മയില്ലേ. നിങ്ങള്‍ക്കെന്നെ ഇഷ്ടമില്ലേ. ഞാന്‍ ഞായറാഴ്ച വൈകീട്ട് മൂന്നു് മണിക്കു് ടൌണിലുള്ള പാര്‍ക്കില്‍ കാത്തു്നില്‍ക്കും. വരണം.. സ്നേഹത്തോടെ..."
അവന്റെ കയ്യും കാലും വിറയ്ക്കാന്‍ തുടങ്ങി. സുഹൃത്തുക്കളോട് പറഞ്ഞാല്‍ ശരിയാക്കിക്കളയും. അവരിലൊരുത്തനു് അവളെ നോട്ടമുള്ളതുമാണു്.
എന്തായാലും പോയേക്കാമെന്നു് കരുതി. നേരിട്ടു് കാര്യം പറഞ്ഞു് ഊരിപ്പോന്നാല്‍ മതിയല്ലോ.
ഞായറാഴ്ചയാകാന്‍ ദിവസങ്ങള്‍ കുറേയെടുത്തതു് പോലെ. കൃത്യം മൂന്നു്മണിയ്ക്ക് തന്നെ പാര്‍ക്കിലെത്തി. നാലു്മണിവരെ കാത്തു. അവളുടെ പൊടി പോലുമില്ല. "വട്ടുകളിപ്പിക്കുന്നതിന്നും ഒരു അതിരൊക്കെയുണ്ട് " അവന്‍ മടങ്ങി.
തിരിച്ചെത്തിയപ്പോള്‍ സുഹൃത്തുക്കളുടെ ചോദ്യം "അവള്‍ വന്നില്ല അല്ലേ".
അവളുടെ കത്തു് അവരുടെ കയ്യില്‍ കണ്ടതു്കാരണം അവന്‍ പറഞ്ഞു "ഇല്ല".
"അവള്‍ വരില്ല. അവളുടെ വിവാഹനിശ്ചയമായിരുന്നു ഇന്നു് "
അന്നാദ്യമായി അവന്‍ നഷ്ടപ്പെടലിന്റെ വേദനയറിഞ്ഞു.

വഞ്ചന

2007-08-12T21:19:00.000+03:00

"ഉമ ഇയാളെ അറിയുമോ?"
"ഉവ്വ്. എന്റെ സ്നേഹിതനാണു് "
"അതായതു് ഇപ്പഴും സുഹൃദ്ബന്ധം ഉണ്ടെന്നു് സമ്മതിക്കുകയാണോ?"
"അല്ല. ഇപ്പഴും സ്നേഹിക്കുന്നുണ്ടെന്നാണു് പറഞ്ഞതു്."
"അപ്പോള്‍ എന്നെ നീ വഞ്ചിക്കുകയായിരുന്നല്ലേ ?"
"എന്തു് തോന്നുന്നു ?"
"എന്റെ തോന്നലല്ലല്ലോ പ്രധാനം."
"ഞാന്‍ ഒരിക്കലും നിങ്ങളെ വഞ്ചിച്ചിട്ടില്ല "
"പിന്നെ അയാളെ സ്നേഹിക്കുന്നുണ്ടെന്നു് പറഞ്ഞതു്..."
"സത്യം. നിങ്ങള്‍ ചോദിച്ചപ്പോള്‍ ഞാന്‍ നേരു് പറഞ്ഞില്ലേ. വഞ്ചിക്കാന്‍ ശ്രമിച്ചില്ലല്ലോ."
"നിനക്കു് നുണ പറയാമായിരുന്നു. എന്നെ വഞ്ചിക്കാമായിരുന്നു..."
ഫോട്ടോ അയാള്‍ ഡിലീറ്റ് ചെയ്തു.

ഭയം

2007-08-11T20:38:00.000+03:00

വളരെയധികം ഉത്കണ്ഠയോടെയാണു് അവര്‍ ആ അനൌണ്‍സ്മെന്റ് ശ്രവിച്ചതു്. കണക്ഷന്‍ ഫ്ലൈറ്റ് 20 മണിക്കൂറോളം വൈകുമത്രേ. അക്കോമഡേഷന്‍ നല്കാമെന്നും സഹകരണം അഭ്യര്‍ത്ഥിക്കുന്നുവെന്നും കൂടി കേട്ടു. "അല്ലാതെ തരമില്ലല്ലോ" അയാള്‍ സഹയാത്രികയോടു് പറഞ്ഞു. വിമാനത്തില്‍ വച്ചുള്ള പരിചയം മാത്രമേ അവളുമായിട്ടുള്ളു. അച്ഛനമ്മമാരുടെ കൂടെ അവധി ചിലവഴിച്ചു് നാട്ടിലേക്കു് പോകുന്നവള്‍. എഞ്ചിനിയറിങ്ങിനു് പഠിക്കുന്നു. ആ എയര്‍ലൈന്‍സിലാണു് പോലും അവളുടെ അച്ഛനു് ജോലി. സൌജന്യയാത്രയായതുകൊണ്ടാണു് ഡയറക്റ്റ് ഫ്ലൈറ്റില്‍ പോകാത്തതെന്നും അയാളുടെ ചോദ്യത്തിനു് മറുപടിയായി അവള്‍ വിശദീകരിച്ചു. അയാളെക്കുറിച്ചെന്തുകൊണ്ടോ ഒന്നും അവള്‍ ചോദിച്ചതുമില്ല.
അക്കോമഡേഷന്‍ കിട്ടിയതു് ഒരു ഡബിള്‍ മുറിയില്‍. തനിക്കു് ഇദ്ദേഹത്തിന്റെ മുറി ഷെയര്‍ ചെയ്യുന്നതില്‍ വിരോധമില്ലെന്നവള്‍ പറഞ്ഞപ്പോള്‍ അയാള്‍ക്കു് ആധിയായി. ഒരു പരിചയവുമില്ലാത്ത ഒരുത്തിയുടെ കൂടെ മണിക്കൂറുകളോളം ഒരു മുറിയില്‍. വരുമ്പോലെ വരട്ടെയെന്നു് കരുതി അയാള്‍ അവളുടെ കൂടെ മുറിയിലെത്തി.
മുറിയിലെത്തിയതും അവളുടെ പ്രകൃതമാകെ മാറി. അതുവരെ ചോദിച്ചതിനു് മാത്രം ഉത്തരം പറഞ്ഞിരുന്ന അവളയാളുടെ കാര്യങ്ങളൊക്കെ ചോദിച്ചറിഞ്ഞു. ഭാര്യ മരിച്ചുപോയിയെന്നു് കള്ളം പറഞ്ഞതെന്തിനെന്നയാള്‍ വിസ്മയിച്ചു. പിന്നീട് അടുത്ത കട്ടിലില്‍ സുഖമായി കിടന്നുറങ്ങുന്ന അവളെക്കണ്ട് അയാള്‍ ആശ്വാസത്തോടെ മയങ്ങി.
നാട്ടിലേക്കുള്ള വിമാനത്തിലിരിക്കുമ്പോള്‍ അവള്‍ വെളിപ്പെടുത്തി "യഥാര്‍ത്ഥത്തില്‍ എനിക്കു് ഭയമുണ്ടായിരുന്നു നിങ്ങളെ"
"എനിക്കും" അയാള്‍ കൂട്ടിച്ചേര്‍ത്തു.

പരദൂഷണം

2007-06-02T21:45:00.000+03:00

അവര്‍ ഷോപ്പിങ്ങിനിറങ്ങിയതായിരുന്നു.ഭാര്യയും ഭര്‍ത്താവും. കുട്ടി കരഞ്ഞപ്പോള്‍ ഭക്ഷണം കൊടുക്കാനും മറ്റുമായി ആ മാളിന്റെ ഒരൊഴിഞ്ഞകോണിലവര്‍ ഇരുന്നു. അന്നത്തെ വിഷയം സ്വദേശികളെപ്പറ്റിയായിരുന്നു. മൊബൈലും മറ്റും തട്ടിപ്പറിക്കുന്നതിനെപ്പറ്റിയും മറ്റും തനിക്കു് ലഭിച്ച അറിവു് ഭര്‍ത്താവു് പങ്കു് വെച്ചപ്പോള്‍ ഭാര്യയ്ക്കറിയിക്കാനുണ്ടായിരുന്നതു് വീടു് കയറി ആക്രമിക്കുന്ന കഥകളും മറ്റുമായിരുന്നു. നേരോ നുണയോ എന്നൊന്നും അറിയാനുള്ള ആഗ്രഹവും അവര്‍ക്കില്ലായിരുന്നു. കിട്ടുന്ന വാര്‍ത്തകള്‍ ചൂടാറാതെ പങ്കു്വെയ്ക്കുക. അത്രമാത്രം. എന്നാലും ഈ നാട്ടില്‍ നിന്നും മടങ്ങാന്‍ അവര്‍ തയ്യാറായിരുന്നില്ല.

പരദൂഷണത്തിനിടെ ആഭരണങ്ങളടങ്ങിയ ബാഗു് താഴെ വീണതവരറിഞ്ഞില്ല. ഭാര്യയുടെ മൊബൈല്‍ ഫോണും ബാങ്ക് കാര്‍ഡും ചില്ലറ പണവും അതിലുണ്ടായിരുന്നു.
കുട്ടി ഭക്ഷണം കഴിച്ചു കഴിഞ്ഞപ്പോള്‍ അവര്‍ എലവേറ്ററിലൂടെ താഴെയിറങ്ങി. താഴെയെത്തിയപ്പോഴാണു് ബാഗു് കാണാതായ വിവരം ശ്രദ്ധയില്‍ പെട്ടതു്. മൊബൈല്‍ ഫോണ്‍ ബാഗിലുള്ളതു് കൊണ്ട് ഒന്നു വിളിച്ചുനോക്കിയാല്‍ തങ്ങളുടെ അടുത്തുണ്ടോയെന്നുറപ്പു് വരുത്താന്‍ ഭര്‍ത്താവു് തന്റെ മൊബൈലില്‍ നിന്നും വിളിച്ചു. റിങ്ങുണ്ട്. പക്ഷെ അടുത്തല്ല. പോയെന്നുറപ്പായി. ആരും എടുക്കുന്നില്ല. വീണ്ടും വിളിച്ചു. ആരോ എടുത്തു് കട്ടാക്കി. പോയെന്നു് തന്നെ ഉറപ്പിച്ചു. എന്നാലും ഒന്നുകൂടി പോയി നോക്കാം. മുകളിലെത്തീട്ടു് വിളിക്കാം. അവര്‍ മുകളിലെത്തി. ഇരുന്ന സ്ഥലത്തു് ഒന്നു കൂടി നോക്കി. വീണ്ടും ഫോണ്‍ ചെയ്തു. യാതൊരു അനക്കവുമില്ല.
"ഒക്കെ കള്ളന്മാരാണു്" അവര്‍ പരിതപിച്ചു. അപ്പോഴതാ കുറച്ചു് സ്വദേശി യുവാക്കള്‍ :"മാഡം, താങ്കളുടെ ബാഗു് നഷ്ടപ്പെട്ടുവോ?"
ഉവ്വെന്നു് പറഞ്ഞപ്പോള്‍ അവര്‍ ബാഗെടുത്തു തന്നു. നന്ദി പറഞ്ഞുപിരിയാന്‍ നേരം ഒരാള്‍ പറഞ്ഞു: എന്തെങ്കിലും നഷ്ടപ്പെട്ടിട്ടുണ്ടോയെന്നു് പരിശോധിച്ചിട്ടു് പോകൂ.
എല്ലാം ഭദ്രമെന്നുറപ്പു് വരുത്തി നന്ദി പറഞ്ഞു അവരിറങ്ങി.
ഈ നാട്ടില്‍ ഇങ്ങനേയും ആളുകളോ: ഭാര്യ അത്ഭുതപ്പെട്ടു.
ങൂം. മൊബൈലില്‍ പൈസയൊന്നുമില്ലാത്തതു് കൊണ്ടാവും തിരിച്ചു തന്നതു് : ഭര്‍ത്താവു് നിരീക്ഷിച്ചു. ഗോള്‍ഡൊന്നും അവര്‍ കണ്ടുകാണില്ല : ഭാര്യയും സമ്മതിച്ചു.
"അല്ലെങ്കില്‍ അവരെന്തിനു് ഫോണ്‍ കട്ടാക്കണം!"

ചിരി

2007-05-31T15:42:00.000+03:00

ബസ്സില്‍ കയറിയയുടന്‍ അവന്‍ നോക്കിയതു് അവളവിടെയുണ്ടോയെന്നാണു്. തെറ്റിയില്ല. അതേ സീറ്റില്‍ തന്നെ. തന്റെ നോട്ടം പ്രതീക്ഷിച്ചിരുന്നതു് പോലെ അവളിങ്ങോട്ടും നോക്കി. ചിരിച്ചു. അവനു് ചിരിക്കാന്‍ പറ്റിയില്ല. ഈ പെണ്ണിതെന്തു് ഭാവിച്ചാണു് ? തന്നേക്കാള്‍ രണ്ടോ മൂന്നോ വയസ്സ് കൂടുതല്‍ കാണും. ഇപ്പോ തന്നെ കൂട്ടുകാരൊക്കെ കളിയാക്കാന്‍ തുടങ്ങി. ഇതിങ്ങനെ വിട്ടാല്‍ പറ്റില്ല. ചോദിച്ചാലോ ? ധൈര്യം വരുന്നില്ല. എന്തു് ചോദിക്കും .. ആലോചിച്ചാലോചിച്ച് ഇറങ്ങാനുള്ള സ്ഥലമെത്തി. അവള്‍ നേരത്തേ ഇറങ്ങിക്കാണും. രണ്ടു് സ്റ്റോപ്പ് മുമ്പാണല്ലോ അവളുടെ കോളേജ്.
ക്ലാസ്സില്‍ ശ്രദ്ധിക്കാനും പറ്റുന്നില്ല. കൂട്ടുകാര്‍ ആരോപിക്കുന്നതു് പോലെ വല്ല പ്രേമവും ! കാണാന്‍ സുന്ദരനായതു് കൊണ്ടു് ആ സാദ്ധ്യത തള്ളാനും പറ്റില്ല. അവളും കാണാന്‍ കുഴപ്പമൊന്നുമില്ലല്ലോ. എന്നാല്‍ പിന്നെ അങ്ങ് തുടങ്ങിയാലോ .. വിവാഹത്തിലേക്കൊന്നും എത്തിക്കാതിരുന്നാല്‍ പോരേ. ഒരു ടൈം പാസ്..
നാളെ എന്തായാലും സംസാരിക്കണം.. ഞായറാഴ്ച വൈകുന്നേരം വീട്ടിലിരിക്കുമ്പാള്‍ അവന്‍ ഉറപ്പിച്ചു. ഇതിങ്ങനെ പോയാല്‍ പറ്റില്ല. ഗേറ്റു് കടന്നു് വരുന്നയാളെക്കണ്ട് അവന്‍ ഞെട്ടിപ്പോയി ! അവള്‍ തന്നെ.
കല്യാണവീട്ടില്‍ പോയ അമ്മയിനിയും എത്തിയിട്ടില്ല. ഇവളെന്തായിവിടെ എന്ന പരിഭ്രമം അവള്‍ക്കു് മനസ്സിലായെന്നു് തോന്നി. അവള്‍ പറഞ്ഞു: "ഞാന്‍ നിന്റെ അമ്മായിയാടാ, വല്ലപ്പഴും ബന്ധുവീടുകളിലൊക്കെ പോകണം".

അഹങ്കാരം

2007-05-14T14:45:00.000+03:00

സമയം വല്ലാതെ വൈകിയല്ലോ.. അയാള്‍ മുന്നിലുള്ള ആളുകളുടെ എണ്ണമെടുക്കാന്‍ തുടങ്ങി. ഇനിയും പത്തുപേരുണ്ട്. അസ്ര്‍ നമസ്കാരത്തിനു് മുമ്പ് കിട്ടുമായിരിക്കും.
തീരാതിരുന്നാല്‍ മതി.
അല്ലെങ്കിലും അവളുടെ ഓരോ നിര്‍ബന്ധങ്ങള്‍ ! വേറെയെവിടെയും ഭക്ഷണം കിട്ടാനില്ലാത്തതു് പോലെ !
എങ്കിലും ഭക്ഷണത്തിനു് ഗുണമോര്‍ക്കുമ്പോള്‍ അങ്ങനെ ചിന്തിക്കാനും വയ്യ. അല്ലെങ്കില്‍ ഇത്ര തിരക്കു് ഇവിടെ കാണുമോ ? സ്വദേശികള്‍ എവിടെയെങ്കിലും ക്യൂ നില്ക്കുന്നതു് ഒരപൂര്‍വ്വകാഴ്ചയാണീ നാട്ടില്‍ !
തന്റെ ഊഴമായപ്പോള്‍ അയാള്‍ ആശ്വസിച്ചു. പ്രതീക്ഷിച്ചത്ര വൈകിയില്ല. തനിക്കും ശ്രീമതിക്കും കുട്ടികള്‍ക്കുമുള്ള പൊതികളുമായി അയാള്‍ നിരത്തിലേക്കിറങ്ങി.
കാര്‍ പാര്‍ക്കു് ചെയ്തിരുന്നതു് ഒരു വേസ്റ്റ്ബിനിന്റെ അടുത്തായിരുന്നു. അവിടേക്കണ്ട കാഴ്ച അയാളെ അലോസരപ്പെടുത്തി. ഒരു സ്ത്രീയും രണ്ടു് കുട്ടികളും ആ വേസ്റ്റ് ബിന്നില്‍ നിന്നും ആരോ ഉപേക്ഷിച്ച ഭക്ഷണത്തിനു് വേണ്ടി തിരയുന്നു. ഈ നാട്ടിലും ഇങ്ങനെയും ആളുകളോ എന്നു് ആത്മഗതവുമായി അയാള്‍ വണ്ടിയെടുക്കാന്‍ ശ്രമിച്ചു. പറ്റുന്നില്ല. ആ കാഴ്ച അയാള്‍ക്കു് മറക്കാന്‍ പറ്റുന്നതായിരുന്നില്ല. ഭക്ഷണപ്പൊതികളുമായി ഇറങ്ങി . അവര്‍ക്കതു് നല്കി. അവരുടെ പ്രതികരണങ്ങള്‍ക്കു് കാത്തുനില്ക്കാതെ വീണ്ടും ഭക്ഷണശാലയിലേക്കു് നടക്കുമ്പോള്‍ അയാള്‍ അഹങ്കരിച്ചു . ഞാനില്ലായിരുന്നെങ്കില്‍ !

കള്ളന്‍

2007-03-14T15:23:00.000+03:00

പതിവു് പോലെ അന്നും അടിയുണ്ടായി. ഉദ്ദേശിച്ച ആളെ കിട്ടാഞ്ഞതിനാല്‍ കൊലപാതകം എന്നതു് വെട്ടിലൊതുങ്ങി. മാറിക്കോടാ, പുറത്തൂന്നു് ആളിറങ്ങീട്ടുണ്ടെന്നവനു് മുന്നറീപ്പു് കൊടുത്തതാ. എന്തു് കാര്യം. ആവശ്യമില്ലാത്തിടത്തു് കയ്യിട്ടു, വെട്ടും കിട്ടി.. എന്നാല്‍ വെട്ടിയില്ല, വെറുതെ കോറിയതേയുള്ളൂ എന്നാണു് വെട്ടിയവന്‍ പറഞ്ഞതു്. അതാവാം ശരി. ഇവ്വിധ കാര്യങ്ങളില്‍ അറിവുള്ളവര്‍ പറയുന്നതു് തന്നെയാവും ശരി.
പതിവു് പോലെ ഞങ്ങളില്‍ ചിലരെ അറസ്റ്റു് ചെയ്തു. അന്നവിടെയില്ലാഞ്ഞവരുടെ ലിസ്റ്റ് കൊടുത്തതില്‍ നിന്നും പോലീസുകാരുടെ ഒരു റാന്‍ഡം സിലക്ഷന്‍. ജയിലിലേക്കു് കൂട്ടുപ്രതികളോടൊപ്പം പോലീസുകാരോടൊപ്പം നടക്കുമ്പോള്‍ അതാ മുന്നിലൊരു കുട്ടി.
"നോക്കമ്മേ , കള്ളന്‍ !"...

ലമ്യ

2007-03-03T21:23:00.000+03:00

"സര്‍ ഒരു വിസിറ്ററുണ്ടു്."
തെല്ലൊരത്ഭുതത്തോടെയാണു് അരുണ്‍ അതു് കേട്ടതു്.
പുതുതായി ഈ നഗരത്തിലെത്തിയതാണു്.
അടുത്ത സുഹൃത്തുക്കളിവിടെയുള്ളതായി ഓര്‍മ്മയില്ല.
ആരായിരിക്കും ! സമയവുമില്ലല്ലോ. പൂജ കാത്തിരുന്നു മുഷിയുമല്ലോ.
"കാര്‍ഡ് വാങ്ങിവരൂ മനോഹര്‍."
"സര്‍ കാര്‍ഡില്ല. പേരു് പറഞ്ഞാലറിയും എന്നു് പറഞ്ഞു."- മനോഹര്‍ തിരിച്ചെത്തി.
"ശരി. എന്നാല്‍ വരാന്‍ പറയൂ."
കാണാന്‍ പോകുന്ന പൂരം എന്തിനു് കേട്ടറിയണം !

മനോഹറിനു് പകരം പിന്നീടു് വന്നതു് മനോഹരിയായ ഒരു സ്ത്രീയാണു്.
"അരുണ്‍, എന്നെ ഓര്‍മ്മയുണ്ടോ?"
ഈ സ്ത്രീയെ മറക്കുവാന്‍ തക്ക പാപം താന്‍ ചെയ്തുവെന്നോ.
ഓര്‍മ്മ കിട്ടുന്നില്ലെന്നു് മാത്രമല്ല. തീരെ അപരിചിതവും.
"ഓര്‍മ്മ കിട്ടുന്നില്ല. പേരു് പറഞ്ഞാല്‍ ഒരുപക്ഷേ"
"ശരി. ഇനി പേരറിയാത്ത ബുദ്ധിമുട്ടു് വേണ്ട. ഞാന്‍ ലമ്യ"
"ലമ്യ ! എനിക്കു് വിശ്വസിക്കാമോ?"
"എന്തേ?"
"എത്ര കാലമായി കൊതിക്കുന്നതാണീ മുഹൂര്‍ത്തം. എന്തേ വന്നതു്?"
"താങ്കളെ കാണാന്‍ തന്നെ."
"ഞാനിവിടെയാണെന്നു്..."
"പൂജ പറഞ്ഞു. ഞാനും പൂജയുമായുള്ള ബന്ധം അറിയില്ലല്ലേ."
"ഇല്ല. പൂജ ഇന്നു് പാര്‍ക്കില്‍ വരാമെന്നു് പറഞ്ഞിട്ടുണ്ടു്. നിന്റെ കാര്‍ത്തിക് ഇപ്പോഴെവിടെയാണു് ?"
"മരിച്ചു. അതു് പറയാന്‍ കൂടിയാണു് വന്നതു്."
"മരിച്ചെന്നോ? എപ്പോ? ഇതു് കളി പറയാനുള്ള സമയമല്ല.ഇന്നു കൂടി അവന്റെ കുറിപ്പുകള്‍ വായിച്ചതാണു് ഞാന്‍"
"അവന്‍ എന്റെ അപരനാമമായിരുന്നു. പൂജയേപ്പോലെത്തന്നെ. അവന്റെ സേവനം
ഇനി ആവശ്യമില്ലെന്നു് തോന്നി. കൊന്നു. പൂജയേയും കൊന്നേക്കാം."

സുവിശേഷം

2007-02-28T20:46:00.000+03:00

അയാള്‍ നെറ്റിലെ ഒരു സുവിശേഷകനായിരുന്നു.
അന്നും അയാള്‍ ഒരു സ്ത്രീയ്ക്ക് ധൈര്യം നല്‍കുകയുണ്ടായി.
അവരുടെ പ്രശ്നം ഇങ്ങനെ: പത്തു് വര്‍ഷത്തിലധികം സ്നേഹിച്ചവനെ വിവാഹം ചെയ്യാന്‍ പറ്റാതെ മറ്റൊരാളുടെ ഭാര്യയായി കഴിയുന്നു. രണ്ടു് കുഞ്ഞുങ്ങളുമായി. ഭര്‍ത്താവു് നല്ലവന്‍. സ്നേഹിതനും വിവാഹിതന്‍. രണ്ടു് മക്കളുടെ പിതാവു്. അങ്ങനേയിരിക്കേ സ്നേഹിതനെ വീണ്ടും കണ്ടുമുട്ടുന്നു. പഴയ സ്നേഹം ഇപ്പോഴുമുണ്ടെന്നു് തിരിച്ചറിയുന്നു. എന്നാല്‍ ഭര്‍ത്താവിനോടും സ്നേഹമാണു്. ഭര്‍ത്താവില്ലാത്ത ജീവിതം അചിന്ത്യം. എന്തു് ചെയ്യും ? ഭര്‍ത്താവിനോടു് ഒളിക്കുന്നതു് ശരിയോ ? തന്റെ വണ്‍വേ പ്രണയങ്ങളെ പറ്റി തുറന്നു് സംസാരിച്ചിട്ടുള്ളവനാണു്. നല്ലൊരു സുഹൃത്താണു്. പക്ഷേ പറഞ്ഞാല്‍...
അയാള്‍ പറഞ്ഞു: നിങ്ങളീ പറഞ്ഞതു് പോലെയാണു് നിങ്ങളുടെ ഭര്‍ത്താവെങ്കില്‍ തീര്‍ച്ചയായും നിങ്ങള്‍ക്കു് ഹൃദയം തുറക്കാം.(വല്ലവന്റെ കാര്യത്തില്‍ എന്തും പറയാമല്ലോ -ആത്മഗതം)

ഓഫീസില്‍ നിന്നും വീട്ടിലെത്തിയ അയാളെ നേരിട്ടതു് ഭാര്യയുടെ നിറകണ്ണുകളായിരുന്നു.

ജോലി

2007-02-28T19:20:00.000+03:00

ഐ വില്‍ സ്റ്റേ ഒണ്‍ലി വണ്‍ യര്‍ മാക്സിമം!!!
പുതുതായി ചേര്‍ന്ന കമ്പനിയിലെ സഹപ്രവര്‍ത്തകനോടവന്‍ പറഞ്ഞു.ഇലക്ട്രിക്കല്‍ എഞ്ചിനീയറിങ്ങ് ബിരുദം നേടിയ തനിക്ക് പറ്റിയ പണിയല്ല ഇത് എന്ന തോന്നല്‍ മറച്ചുവെക്കാനവന്‍ ഇഷ്ടപ്പെട്ടില്ല.രാവിലെ ആറ് മുതല്‍ ഉച്ചയ്ക്ക് രണ്ടര വരെ മാത്രം ജോലി.തരക്കേടില്ലാത്ത കൂലി.പിന്നെന്താ പ്രശ്നം? പുതിയ സുഹൃത്ത് തിരക്കി.
ബോയിലര്‍ ഓണ്‍ ചെയ്യാനും ട്യൂബ് ലൈറ്റ് മാറ്റാനും മെഷിനറി ക്ലീന്‍ ചെയ്യാനുമാണോ ഞാന്‍ എഞ്ചിനീയറിങ്ങ് പഠിച്ചത്? ഇവിടെ വന്ന് പെട്ടു് പോയി!!!

എന്താ, താങ്കള്‍ക്ക് ജോലി ഇഷ്ടപ്പെട്ടില്ലെന്ന് കേള്‍ക്കുന്നു.. മാനേജരാണ്.
ഇഷ്ടപ്പെട്ടു എന്നു് കേട്ടാലല്ലേ സര്‍ അത്ഭുതത്തിന് വകയുള്ളൂ.എന്റെ കഴിവുകള്‍ നിങ്ങള്‍ ഇല്ലാതാക്കുകയാണ്.ലേബറും എഞ്ചിനീയറും ഒരേ ജോലി ചെയ്യുന്നത് ഇവിടെ മാത്രമേ ഉണ്ടാവുകയുള്ളൂ.
റിലാക്സ് യങ്ങ്മേന്‍!! മെയിന്റനന്‍സ് ഈസ് എ ഗ്രൂപ്പ് ടാസ്ക്..
യസ് സര്‍, എന്നെ എന്റെ പാട്ടിന് വിട്ടേര്..ഐയാം നോട്ട് കംഫര്‍ട്ടബ്ള്‍ ഹിയര്‍...

--------------------------------------------****************************----------------------------------------
എങ്ങനെയാ ജോലി പോയതു്?
ആ മാനേജര്‍ ശരിയില്ല. അയാള്‍ക്കു് കോംപ്ലക്സായിരുന്നു. ഞാനെങ്ങാനും അയാളുടെ ജോലി തട്ടിയെടുത്താലോ എന്നു് കരുതിക്കാണും. അയാള്‍ വെറും ഡിപ്ലോമയല്ലേ. അതു് കൊണ്ടായിരിക്കാം പ്രൊബേഷന്‍ പിരീഡില്‍ തന്നെ എന്നെ ഒഴിവാക്കിയതു്..